Upp­gjör Lands­bank­ans fyr­ir fyrstu þrjá mán­uði árs­ins 2018

Afkoma Landsbankans var jákvæð um 8,1 milljarð króna eftir skatta fyrstu þrjá mánuði ársins 2018. Hagnaður bankans á sama tímabili árið 2017 nam 7,6 milljörðum króna. Arðsemi eigin fjár var 13,7% á fyrsta ársfjórðungi samanborið við 12,5% á sama tímabili 2017.

Hreinar vaxtatekjur voru 9,6 milljarðar króna og hækkuðu um 20,2% á milli tímabila. Hreinar þjónustutekjur námu 1,7 milljörðum króna og lækkuðu um 20,1% frá sama tímabili árið áður. Jákvæðar virðisbreytingar námu 1,0 milljarði króna á tímabilinu en voru 1,8 milljarðar króna á sama tímabili í fyrra.

Aðrar rekstrartekjur námu 4,5 milljörðum króna samanborið við 3,8 milljarða króna á sama tímabili 2017, sem samsvarar 18% hækkun á milli tímabila. Vanskilahlutfall hélt áfram að lækka og var 0,6% á fyrsta ársfjórðungi samanborið við 1,3% á sama tímabili 2017.

Vaxtamunur eigna og skulda nam 2,7% á fyrsta ársfjórðungi 2018 en var 2,2% á sama tímabili árið áður.

Rekstrartekjur bankans fyrstu þrjá mánuði ársins námu 16,8 milljörðum króna samanborið við 15,7 milljarða króna á sama tímabili árið 2017 sem samsvarar 7% hækkun á milli tímabila. Rekstrarkostnaður hækkar um 1,4% miðað við sama tímabil árið 2017 en alls nam rekstrarkostnaður bankans 6 milljörðum króna á tímabilinu samanborið við 5,9 milljarða á sama tímabili árið 2017. Rekstrarkostnaður að frátöldum launum og launatengdum gjöldum nam 2,3 milljörðum króna sem er lækkun um 3,8% frá sama tímabili árið 2017. Kostnaðarhlutfall fyrstu þriggja mánaða ársins var 37,9% samanborið við 42,5% á sama tímabili árið áður.

Útlán Landsbankans jukust um 11 milljarða króna á tímabilinu og var aukningin bæði í útlánum til fyrirtækja og einstaklinga. Innlán hjá Landsbankanum jukust um 2,8% á milli tímabila, eða um 16,9 milljarða króna. Þar af jukust innlán einstaklinga um 8 milljarða króna.

Eigið fé Landsbankans var 228,6 milljarðar króna 31. mars sl. og eiginfjárhlutfallið var 24,7%. Landsbankinn greiðir á þessu ári alls 24,8 milljarða króna í arð. Annars vegar er um að ræða 15,4 milljarða króna arðgreiðslu vegna rekstrarársins 2017 sem samsvarar um 78% af hagnaði ársins og hins vegar er um að ræða sérstaka arðgreiðslu til hluthafa, að fjárhæð 9,5 milljarðar króna, sem verður greidd til hluthafa 19. september 2018.

Árshlutareikningur samstæðu 1F 2018

Afkomukynning

Fréttatilkynning

Fjárhagsbók

Lilja Björk Einarsdóttir, bankastjóri Landsbankans, segir:

„Rekstur Landsbankans á fyrsta ársfjórðungi ársins 2018 gekk vel. Hærri markaðshlutdeild og aukin umsvif í þjóðfélaginu hafa leitt til þess að bæði útlán og innlán hjá bankanum hafa vaxið umtalsvert á milli tímabila. Um leið hefur aðhald í rekstri og hagstæðari fjármagnsskipan bankans skilað markverðum árangri. Það er ánægjulegt að áfram eru skýr merki um sterkari stöðu heimila og fyrirtækja, bæði í vaxandi innlánum, en ekki síður í minnkandi vanskilum.

Landsbankinn leggur mikla áherslu á að byggja upp traust og langvarandi viðskiptasambönd við einstaklinga og fyrirtæki. Við teljum að þessi áhersla eigi ríkan þátt í að kannanir sýna aukna ánægju með þjónustu bankans, traust til bankans hefur aldrei mælst hærra og hlutdeild bankans á einstaklings- og fyrirtækjamarkaði hefur aukist.

Á undanförnum mánuðum hefur Landsbankinn kynnt margar nýjar rafrænar þjónustuleiðir, þar á meðal Landsbankaappið en áður hafði bankinn m.a. boðið viðskiptavinum að stilla sjálfir yfirdráttinn í netbankanum og sækja rafrænt um greiðsludreifingu kreditkorta. Í öllum tilvikum hafa viðtökurnar verið vonum framar og það er ljóst að viðskiptavinir vilja eiga kost á að stunda sín bankaviðskipti í tölvunni eða í símanum, hvar og hvenær sem er. Undir lok síðasta árs tók Landsbankinn í notkun nýtt innlána- og greiðslukerfi frá Sopra, fyrstur íslenskra banka. Bankinn byggir framþróun í stafrænni tækni á traustum grunni og á þessu ári mun bankinn leggja enn meiri áherslu en áður á nýjungar í stafrænni þjónustu.“

Helstu atriði úr rekstri á fyrsta ársfjórðungi (1F) 2018

Rekstur:

• Hagnaður Landsbankans á fyrsta ársfjórðungi nam 8,1 milljarði króna, samanborið við 7,6 milljarða króna á 1F 2017.
• Arðsemi eiginfjár eftir skatta nam 13,7%, samanborið við 12,5% fyrir sama tímabil árið 2017.
• Hreinar vaxtatekjur námu 9,6 milljörðum króna á fyrstu þremur mánuðum ársins í samanburði við 8,0 milljarða króna á sama tímabili árið 2017.
• Virðisbreytingar útlána á fyrstu þremur mánuðum ársins voru jákvæðar um 1,0 milljarð króna.
• Hreinar þjónustutekjur lækkuðu um 20,1% og námu 1,7 milljörðum króna en þær voru 2,1 milljarðar króna á 1F 2017.
• Vaxtamunur eigna og skulda nam 2,7% samanborið við 2,2% á sama tímabili árið áður.
• Laun og launatengd gjöld námu 3,7 milljörðum króna og hækkuðu um 4,9% á milli tímabila.
• Annar rekstrarkostnaður nam 2,3 milljörðum króna og lækkaði um 3,8% frá sama tímabili árið áður.
• Kostnaðarhlutfall fyrstu þriggja mánaða ársins var 37,9% samanborið við 42,5% á sama tíma árið áður.
• Stöðugildi voru 998 þann 31. mars en voru 1.000 á sama tíma í fyrra.

Efnahagur:

• Eigið fé Landsbankans í lok mars sl. nam um 228,6 milljörðum króna og lækkaði um 7,1% frá áramótum
• Eiginfjárhlutfall bankans þann 31. mars 2018 var 24,7% en var 27,4% í lok mars 2017. Eiginfjárviðmið Fjármálaeftirlitsins fyrir Landsbankann er 21,4%.
• Heildareignir bankans námu 1.206 milljörðum króna í lok mars 2018.
• Innlán viðskiptavina námu 622 milljörðum króna í lok mars 2018 samanborið við 605,2 milljarða króna í lok árs 2017.
• Ný útlán til viðskiptavina á fyrsta ársfjórðungi eru um 142 milljarðar króna en að teknu tilliti til afborgana, »virðisbreytinga og fleiri þátta hækkuðu heildarútlán um 11 milljarða króna á tímabilinu.
• Lausafjárstaða bankans er sem fyrr sterk, jafnt í erlendri mynt sem í íslenskum krónum, og vel umfram kröfur eftirlitsaðila. Lausafjárhlutfallið var 171% í lok mars 2018.
• Heildarvanskil hjá fyrirtækjum og heimilum námu 0,6% í lok mars 2018 samanborið við 0,9% í lok árs 2017.

Helstu niðurstöður (fjárhæðir í milljónum króna)