Landsbankinn leggur ríka áherslu á persónuvernd viðskiptavina sinna og þeirra sem eiga samskipti við bankann í þeim tilgangi að standa vörð um mannréttindi og friðhelgi einkalífs þeirra. Í stefnunni getur þú m.a. lesið um hvaða upplýsingum bankinn safnar um þig, hvernig þær eru notaðar, hvernig öryggi þeirra er tryggt og hvaða réttindi persónuverndarlög fela þér.

Stefna þessi nær til vinnslu persónuupplýsinga í allri starfsemi bankans og allra einstaklinga sem eru í viðskiptum m.a. fyrrverandi, núverandi og verðandi viðskiptavina bankans, aðila sem eru tengdir viðskiptavini eins og fjölskyldumeðlima auk ábyrgðamanna og umboðshafa. Stefnan nær einnig til annarra einstaklinga en viðskiptavina t.d. þeirra sem eiga samskipti við bankann, heimsækja starfsstöðvar eða vef bankans, sækja um styrk eða taka þátt í viðburðum á vegum bankans.

Markmið stefnunnar er að taka saman heildstætt yfirlit yfir þær persónuupplýsingar sem bankinn vinnur með ásamt því að upplýsa viðskiptavini, starfsfólk og aðra um hvernig bankinn safnar og fer með persónuupplýsingar í þeim tilgangi að treysta fylgni við lög og reglur.

Stefnan gildir ekki um starfsemi lögaðila hvorki tengdra félaga né dótturfélaga Landsbankans. Þó getur bankanum verið nauðsynleg að vinna upplýsingar um tiltekna einstaklinga sem tengjast lögaðilum í viðskiptum við bankann eins og raunverulega eigendur, stjórnarmeðlimi, framkvæmdastjórn, prókúruhafa og eftir atvikum starfsfólk lögaðila.

Vakin er athygli á að sérhæfðari fræðsla um meðferð upplýsinga þinna getur verið veitt í almennum viðskiptaskilmálum Landsbankans, sérskilmálum eða með tilfallandi upplýsingagjöf í tengslum við ákveðna vöru eða þjónustuleið.

Söfnun og vinnsla persónuupplýsinga er forsenda þess að bankinn geti veitt þér eða fyrirtækjum, sem þú starfar fyrir eða hefur aðkomu að, þá fjármálaþjónustu sem óskað hefur verið eftir. Dæmi um persónuupplýsingar sem þú afhendir eru:

• Grunnupplýsingar: nafn, kennitala, heimilisfang, símanúmer, netfang, nafn vinnuveitanda og aðrar grunnupplýsingar eftir atvikum um ríkisfang, hjúskaparstöðu, maka, börn og tengda aðila eins og lögráðamann, umboðshafa eða ábyrgðarmann.
• Samskipta- og samningsupplýsingar: öll samskipti þín við bankann sem m.a. fara fram með tölvupósti, netspjalli, skriflega, munnlega eða á samfélagsmiðlum. Sömuleiðis vinnur bankinn allar upplýsingar sem leiða af eða eru afhentar í tengslum við samninga milli þín og bankans t.d. um einstaka vörur eða þjónustu.
• Upplýsingar um auðkenni: hvers konar afrit af lögbundnum eða rafrænum skilríkjum þ.m.t. afrit af vegabréfi eða ökuskírteini, hvernig þú auðkennir þig og eftir hvaða leiðum. Einnig upplýsingar um tíma og dagsetningu heimsóknar í útibú bankans ef þú kýst að skrá kennitölu þína við komuna.
• Fjárhagsupplýsingar: allar upplýsingar sem tengjast núverandi og fyrrverandi viðskiptum og viðskiptasögu m.a. um stöðu og tegund reikninga, veltu, uppruna fjármagns, hreyfingayfirlit og upplýsingar um greiðslukort, greiðslusögu og greiðslufyrirmæli ásamt upplýsingum um tekjur, útgjöld, fjárhagslegar skuldbindingar og eigna- og skuldastöðu.
• Upplýsingar sem safnast við rafræna vöktun: hljóð- og myndbandsupptökur sem safnað er með eftirlitsmyndavélum á starfsstöðvum bankans, í hraðbönkum og með hljóðritun símtala.
• Tæknilegar upplýsingar og afleiddar upplýsingar um hegðun og notkun: um búnað og tæki sem þú notar til að tengjast vef bankans, netbönkum og appi eins og notendanafn, kjörstillingar, IP-tala, tegund, númer og stillingar snjalltækis, stýrikerfi og tegund vafra, tungumálastillingar, hvernig þú tengist okkur, hvaðan og hvaða aðgerðir þú framkvæmir.
• Opinberar upplýsingar: úr opinberum skrám t.d. þjóðskrá, fasteignaskrá, ökutækjaskrá, hlutafélagaskrá, Lögbirtingablaðinu og öðrum opinberum skrám.
• Viðkvæmar persónuupplýsingar: um þjóðernislegan uppruna, stjórnmálaleg tengsl, aðild að verkalýðsfélagi, heilsufarsupplýsingar, fingraför og andlitsauðkenni. Vakin er athygli á því að þegar þú notar fingrafar eða andlitsgreiningartækni við innskráningu í Landsbankaappið er það einungis gert á símtæki þínu en bankinn fær ekki afrit af persónugreinanlegum lífkennaupplýsingum.
• Aðrar upplýsingar: Framangreind upptalning er ekki tæmandi og bankinn getur unnið aðrar upplýsingar um þig sem eru nauðsynlegar hverju sinni eftir eðli viðskiptasambandsins eða samskipta þinna við bankann.

Í undantekningartilvikum er bankanum nauðsynlegt að safna upplýsingum sem flokkast sem viðkvæmar persónuupplýsingar. Í öðrum tilvikum hefur safn fjárhagsupplýsinga, s.s. færsluyfirlit vegna greiðslukorta eða notkun veltureiknings, að geyma viðkvæmar persónuupplýsingar sem gætu gefið til kynna ákveðna hegðun. Við hvorki söfnum viðkvæmum upplýsingum um þig né vinnum þær án skýrrar heimildar og þegar nauðsyn krefur. Kjósir þú að afhenda ekki nauðsynlegar upplýsingar getur það leitt til þess að ekki er unnt að veita þá þjónustu sem óskað er eftir.

Vinnsla persónuupplýsinga um börn

Vinnsla persónuupplýsinga um börn getur farið fram ef hún er nauðsynleg til að framkvæma umbeðin viðskipti eða veita þjónustu, t.d. vegna stofnunar greiðslureiknings og útgáfu debetkorts. Samþykki forráðamanns er aflað hafi barn ekki náð 13 ára aldri ef barni er boðin rafræn þjónusta yfir netið í samræmi við persónuverndarlög. Allt markaðsefni þ.m.t. gjafir, tilkynningar og fríðindi sem sniðið er að börnum er sent forráðamönnum og eftir atvikum börnum. Þú getur hvenær sem er afþakkað slíkt markaðssetningarefni og gjafir í netbanka einstaklinga eða í réttindagátt bankans. Bankinn getur haft samband við þig til þess að athuga hvort ákvörðun þín hafi breyst.

Landsbankinn vinnur persónuupplýsingar í skýrum og yfirlýstum tilgangi í samræmi við persónuverndarlög, reglur bankans og stefnu þessa. Tilgangur þess að bankinn vinnur persónuupplýsingar er margvíslegur meðal annars svo unnt sé að:

• Hafa samband við þig, auðkenna þig og tryggja öryggi og áreiðanleika í viðskiptum m.a. með áreiðanleikakönnun á viðskiptavinum. Bankinn notar ýmsar leiðir til að hafa samband við þig t.d. með sendingu tölvupósta, tilkynninga og skilaboða í gegnum netbanka, Landsbankaappið, vefsvæði bankans og í gegnum samfélagsmiðla.
• Framkvæma umbeðin viðskipti, veita þér þá fjármálaþjónustu og -ráðgjöf og svara fyrirspurnum t.d. stofna og viðhalda viðskiptasambandi, framkvæma greiðslu- og lánshæfismat og ákveða sjálfsafgreiðsluheimildir, meta útlánaáhættu og koma í veg fyrir skuldsetningu umfram greiðslugetu, greina stöðu þína með hliðsjón af vöru- og þjónustuframboði bankans svo unnt sé að veita þér ráðgjöf m.a. um eignastýringu, lífeyrissparnað eða aðra þjónustu, taka á móti umsóknum og greiða út lífeyrissparnað.
• Í öryggis- og eignavörsluskyni til að vernda viðskiptavini, starfsfólk og aðra sem eiga erindi við bankann, tryggja rekjanleika viðskipta m.a. með rafrænni vöktun og rannsaka mál eða koma í veg fyrir peningaþvætti, fjármögnun hryðjuverka, fjársvik og annars konar refsiverða háttsemi.
• Þróa vöru- og þjónustuframboð bankans, efla nýsköpun og þjónustustig, bjóða þér persónubundna þjónustu, bregðast við ábendingum eða kvörtunum og vinna svör þín úr markaðs- og/eða þjónustukönnunum.
• Þróa lausnir og skýrslur í þágu útlána- og áhættustýringar m.a. til að mæla og hafa eftirlit með útlánaáhættu, rekstraráhættu, markaðsáhættu, tryggingaráhættu og í þágu fjárstýringar bankans.
• Reka og viðhalda vefsvæðum og vefþjónustu bankans og bæta notendaupplifun á vefnum, í Landsbankaappinu og í netbönkum einstaklinga og fyrirtækja og eftir atvikum öðrum veflausnum bankans.
• Bregðast við lögfræðilegum beiðnum og tryggja net- og upplýsingaöryggi m.a. með því að greina, rannsaka og koma í veg fyrir fjársvik og annars konar misferli.
• Stunda markaðs- og kynningarstarf og veita þér persónubundna og sérsniðna þjónustu, senda þér skilaboð um fríðindi og efni sem kunna að vekja áhuga þinn eða þú hefur óskað eftir. Vakin er athygli á því að ljós- og myndbandsupptökur fara fram á ráðstefnum, kynningum og annars konar viðburðum bankans sem eftir atvikum birtast opinberlega á vefsvæðum bankans þ.m.t. samfélagsmiðlum.
• Framkvæma tölfræðilega greiningu á tilteknum vörum, þjónustu- eða boðleiðum, afgreiðslu eða einstökum þáttum í starfsemi bankans. Slík tölfræðigreining er unnin á ópersónugreinanleg hátt ef mögulegt er.

Heimildir til vinnslu persónuupplýsinga

Að langmestu leyti grundvallast söfnun og önnur vinnsla persónuupplýsinga um þig hjá bankanum á samningi milli þín og bankans um tiltekna þjónustu svo hægt sé að veita þá fjármálaþjónustu sem óskað er eftir eða til að fullnægja lagaskyldu sem hvílir á bankanum sem eftirlitsskyldum aðila á fjármálamarkaði. Í ákveðnum tilvikum óskar bankinn eftir upplýstu samþykki þínu fyrir vinnslu persónuupplýsinga. Í þeim tilvikum getur þú hvenær sem er dregið veitt samþykki til baka og er þá þeirri vinnslu sem samþykkið nær til hætt.

Loks geta upplýsingar þínar verið unnar því bankinn, þú sjálfur eða þriðji aðili hefur lögmæta hagsmuni af því að upplýsingar séu unnar. Slík vinnsla fer ekki fram ef ljóst er að hagsmunir þínir vega þyngra en hagsmunir bankans eða þriðja aðila af því að vinnslan fari fram. Eftirfarandi vinnsluaðgerðir fara fram á grundvelli lögmætra hagsmuna: vinnsla grunnupplýsinga úr þjóðskrá, ákvörðun um vildarþjónustu fyrir viðskiptavini og varðveisla viðskiptasögu fyrrverandi viðskiptavina, flokkun og eftirlit með útlánum, þróun og prófun á nýjum vörum og þjónustuleiðum, í þágu markaðssetningar m.a. með markaðs- og markhópagreiningu og í þágu net- og upplýsingaöryggis.

Sjálfvirk ákvarðanataka

Í ákveðnum tilvikum útbýr bankinn persónusnið um þig með sjálfvirkri vinnslu persónuupplýsinga þinna til að meta eða spá fyrir um ákveðna þætti er varða hagi þína eins og þróun fjárhagsstöðu eða líkur á vanskilum. Dæmi um persónusnið er útreikningur bankans á lánshæfiseinkunn. Persónusnið getur einnig verið unnið í þágu markaðssetningar og net- og upplýsingaöryggis t.d. þegar ákveðið er hvaða vildarþjónusta hentar þér og með mynsturgreiningu í netbanka til að hámarka öryggi fjárhagsupplýsinga þinna.

Persónusnið getur einnig verið liður í sjálfvirkri ákvörðunartöku sem þig varðar en hún fer þannig fram að hugbúnaður vinnur persónuupplýsingar um þig á sjálfvirkan hátt og tekur ákvörðun, sem hefur áhrif á hagsmuni þína, án þess að mannshönd eða -hugur komi að henni. Dæmi um sjálfvirka ákvarðanatöku er ákvörðun um fyrirgreiðslu í sjálfsafgreiðslu í Landsbankaappinu sem byggir m.a. á lánshæfiseinkunn þinni.

Sjálfvirk ákvarðanataka sem hefur bein áhrif á hagsmuni þína fer einungis með samþykki þínu, ef hún er forsenda þess að unnt sé að gera eða framkvæma samning milli þín og bankans eða ef lög heimila sérstaklega. Þú getur komið á framfæri athugasemdum eða vefengt sjálfvirka ákvörðun með því að senda tölvupóst á personuvernd@landsbankinn.is.

Framangreindar persónuupplýsingar sem bankinn býr yfir berast yfirleitt beint frá þér þegar þú stofnar til viðskipta, sækir um tiltekna vöru eða þjónustu eða hefur samband við bankann t.d. með tölvupósti, netspjalli eða öðrum þjónustuleiðum bankans.

Upplýsingar um þig geta þó einnig borist frá utanaðkomandi aðilum m.a. samstarfsaðilum bankans eins og kortaútgefendum, greiðslumiðlunarþjónustum eða opinberum aðilum. Jafnframt geta borist upplýsingar um þig frá ótengdum aðilum eins og fjárhagsupplýsingastofum, tolla- og skattayfirvöldum eða úr opinberum skrám. Utanaðkomandi aðilum er óheimilt að afhenda bankanum upplýsingar um þig nema hafa til þess heimild t.d. samþykki þitt eða heimild í lögum.

Bankanum kann einnig að vera nauðsynlegt að afhenda persónuupplýsingar þínar til innlendra eða erlendra samstarfs- og/eða þjónustuaðila bankans svo unnt sé að veita þér tiltekna þjónustu. Bankinn velur samstarfs- og þjónustaðila af kostgæfni og afhendir ekki persónuupplýsingar nema þeir geti staðist öryggiskröfur bankans. Erlendir viðskiptabankar fá upplýsingar í tilefni af erlendum greiðslum og uppgjöri þeirra. Samstarfsaðilar við greiðslumiðlun og kortaútgáfu, innheimtu vanskilakrafna, rekstrar- og hýsingaraðilar upplýsingakerfa, fjárhagsupplýsingastofa eins og Creditinfo og vörsluaðilar fjármálagernina eru einnig dæmi um aðila sem nauðsynlegt er að afhenda persónuupplýsingar vegna þeirrar þjónustu sem bankinn veitir þér.

Afhending getur einnig farið fram með samþykki þínu, t.d. ef þú óskar eftir að bankinn afhendi fjártæknifyrirtæki eða öðrum aðila greiðsluupplýsingar þínar. Jafnframt getur þú veitt bankanum heimild til að afhenda annars konar upplýsingar eins og nafn, netfang eða símanúmer þitt til samstarfsaðila í þágu markaðssetningar.

Í vissum tilvikum er bankanum skylt að afhenda persónuupplýsingar til löggæsluyfirvalda, stjórnvalda eða annarra eftirlitsaðila innanlands og utan á grundvelli lagaskyldu eða alþjóðasamninga. Bankanum er umhugað um að tryggja mannréttindi viðskiptavina sinna, þ.m.t. rétt til friðhelgi einkalífs og persónuverndar, og afgreiðir slíkar beiðnir í samræmi við skjalfest verklag svo ekki séu afhentar umfangsmeiri upplýsingar en eru nauðsynlegar hverju sinni og einungis ef fyrir liggur skýr heimild til afhendingarinnar.

Persónuverndarlög fela þér ákveðin réttindi m.a. til fræðslu og upplýsinga um það hvort bankinn vinni persónuupplýsingar um þig og hvernig meðferð þeirra er háttað í starfsemi bankans. Þú getur á einfaldan hátt gætt réttinda þinni í svokallaðri réttindagátt viðskiptavina á vef bankans þar sem unnt er að óska eftir:

-Aðgangi að eigin persónuupplýsingum

Þú átt rétt á staðfestingu frá bankanum um það hvort unnið sé með persónuupplýsingar þínar og ef svo er til aðgangs að þeim persónuupplýsingum. Þá áttu jafnframt rétt á ákveðnum lágmarksupplýsingum um tilhögun vinnslu sem m.a. eru veittar í stefnu þessari.

- Flutningi persónuupplýsinga

Þú getur óskað eftir að tilteknar persónupplýsingar sem þú hefur látið bankanum í té verði fluttar til annars aðila, sem vísað er á, ef það er tæknilega framkvæmanlegt. Einungis er um að ræða persónuupplýsingar sem bankinn hefur aflað á grundvelli samþykkis þíns eða vegna framkvæmdar samnings og eru unnar með sjálfvirkum hætti.

- Leiðréttingu eða eyðingu persónuupplýsinga

Þú getur hvenær sem er óskað eftir að rangar eða óáreiðanlegar persónuupplýsingar um þig verði leiðréttar. Í ákveðnum tilvikum átt þú jafnframt rétt á að tilteknum persónuupplýsingum um þig sé eytt.

- Takmörkun eða andmæla vinnslu persónuupplýsinga

Þú getur ávallt andmælt vinnslu persónuupplýsinga, þ.m.t. gerð persónusniðs, sem fer fram í þágu beinnar markaðssetningar og afþakkað kynningarefni um fríðindi, vörur og þjónustu bankans í netbanka einstaklinga, Landsbankaappinu eða í réttindagátt bankans. Einnig getur þú andmælt vinnslu persónuupplýsinga vegna sérstakra aðstæðna þinna. Loks getur þú í ákveðnum tilvikum farið fram á að vinnsla persónuupplýsinga þinna sé takmörkuð tímabundið.

Bankinn verður við beiðnum er varða ofangreind réttindi þér að kostnaðarlausu nema beiðni sé tilefnislaus, óhófleg eða ef farið er fram á afhendingu fleiri en eins afrits af persónuupplýsingum. Nauðsynlegt er fyrir einstaklinga að sanna á sér deili þegar þeir óska eftir að neyta réttinda sinna. Nánari upplýsingar um réttindi þín er að finna í réttindagátt bankans.

Þú átt einnig rétt á að kvarta til Persónuverndar komi upp ágreiningur um meðferð persónuupplýsinga þinna hjá bankanum. Við vonum hins vegar að þú leitir til okkar fyrst með mál sem tengjast persónuvernd svo við getum aðstoðað þig. Kjósir þú að snúa þér beint til Persónuverndar getur þú sent tölvupóst á netfangið: postur@personuvernd.is.

Engin þjónusta eða hugbúnaður er fullkomlega örugg. Hafðu samband við bankann við fyrsta tækifæri ef þú hefur áhyggjur af því að persónuupplýsingar þínar séu í hættu eða telur að einhver hafi komist yfir lykilorðið þitt eða aðrar upplýsingar með því að senda tölvupóst á personuvernd@landsbankinn.is. Ef upp kemur öryggisbrestur hjá bankanum eða vinnsluaðilum bankans sem hefur áhrif á þig mun bankinn upplýsa þig um slíkt eins og lög gera ráð fyrir.

Persónuupplýsingar þínar eru varðveittar í öruggu umhverfi sem ver upplýsingarnar fyrir óheimilum aðgangi, misnotkun eða miðlun. Bankinn er með vottað stjórnkerfi upplýsingaöryggis samkvæmt upplýsingaöryggisstaðlinum ÍST ISO/IEC 27001:2013 og hefur jafnframt sett sér upplýsingaöryggisstefnu, reglur um upplýsingaöryggi, öryggisverkferla og innleitt viðeigandi skipulagslegar og tæknilegar öryggisráðstafanir í samræmi við lög og reglur um net- og upplýsingaöryggi.

Vörur og þjónustuframboð bankans eru einnig hannað með öryggi og persónuvernd þína í huga. Bankinn metur reglulega áhættu af vinnslu persónuupplýsinga sem leiðir af upplýsingakerfum og hugbúnaði í þeim tilgangi að velja viðeigandi öryggisráðstafanir og tryggja sem best persónuvernd þeirra einstaklinga sem vinnsla í kerfum og hugbúnaði bankans varðar.

Jafnframt stuðlar bankinn að virkri öryggisvitund starfsfólks og útbýr fræðsluefni samkvæmt persónuverndarlögum um meðferð og öryggi persónuupplýsinga. Þagnarskylda hvílir á öllum starfsmönnum bankans samkvæmt reglum bankans og lögum um fjármálafyrirtæki.

Vefsvæði bankans vista vefkökur í tölvu eða á snjalltæki þínu. Vefkökur eru litlar textaskrár sem geyma upplýsingar til að greina notkun á vefsvæðum bankans og bæta upplifun notenda. Vefkökur eru einnig notaðar til að sníða vefsvæðið að þínum þörfum, t.d. til að stuðla að virkni síðunnar, vista stillingar þínar, vinna tölfræðilegar upplýsingar, greina umferð um vefsvæðin og í markaðslegum tilgangi.

Vefsvæði bankans vinnur með ólíkar tegundir af vefkökum á vefsvæðum bankans. Svokallaðar setukökur (e. session cookies) eyðast almennt þegar notandi fer af vefsvæðinu. Viðvarandi kökur vistast hins vegar á tölvu notanda eða tæki og muna aðgerðir þínar eða val á vefsvæðum bankans.

Nauðsynlegar vefkökur eins og tölfræðikökur og virknikökur virkja eiginleika á vefsvæðum bankans sem eru forsenda fyrir notkun vefsvæða bankans svo hægt sé að nota þau eins og til er ætlast og er því ekki krafist samþykkis fyrir notkun þeirra heldur byggja þær á lögmætum hagsmunum bankans. Nauðsynlegar vefkökur eru oftast setukökur frá fyrsta aðila sem eru eingöngu notaðar af Landsbankanum.

Vefkökur frá fyrsta aðila eru ekki forsenda fyrir notkun vefsvæða bankans. Þær gegna engu að síður mikilvægu hlutverki fyrir notkun og virkni vefsvæða þar sem þær auðvelda notkun t.d. með því að forútfylla form og eyðublöð og muna stillingar. Fyrstu aðila vefkökur senda eingöngu upplýsingar um þig til Landsbankans og óskar bankinn eftir samþykki þínu fyrir notkun þeirra.

Þriðju-aðila kökur eru til komnar vegna þjónustu sem Landsbankinn kaupir af þriðja aðila t.d. greiningar- og auglýsingakökur. Með því getur bankinn aðlagað vefsvæðin betur að þörfum notenda, greint notkun vefsvæða betur og útbúið markaðsefni og auglýsingar sem eru sérsniðnar ákveðnum markhópum. t.d. með því að skoða:

• Fjölda gesta, fjölda heimsókna frá gestum, dags- og tímasetningu heimsóknar
• Hvaða síður innan vefsvæða eru skoðaðar og hversu oft
• Tegund skráa sem eru sóttar af vefsvæðunum
• Hvaða tæki, stýrikerfi eða tegund vafra er notað til skoðunarinnar
• Hvaða leitarorð úr leitarvélum vísa á vefsvæðin

Þriðju-aðila vefkökur senda upplýsingar um þig til annars vefsvæðis í eigu þriðja aðila eins og Google eða Facebook. Þessir þriðju aðilar geta einnig komið vefkökum fyrir í netvafra þínum og með þeim hætti nálgast upplýsingar um heimsóknir þínar á vefsvæði bankans og hvaða efni þú hefur áhuga á að skoða.

Hægt er að breyta stillingum á flestum vöfrum þannig að þeir taki ekki á móti vefkökum. Einnig er hægt að eyða vefkökum með einföldum hætti. Nánari upplýsingar um hvernig það er gert má finna hér. Nánari lýsingu á vefkökum, m.a. hvaða vefkökur frá þriðju aðilum bankinn notar, má finna á vefsíðu bankans. Einnig má nálgast nánari upplýsingar um hvernig þriðju aðilar nota vefkökur á vefsíðum þeirra.

Almennt geymir bankinn persónuupplýsingar þínar á meðan viðskiptasamband er í gildi milli þín og bankans, eins lengi og lög kveða á um eða lögmætir hagsmunir bankans krefjast. Strangt regluverk gildir um starfsemi bankans sem leiðir til þess að mismunandi varðveislutími getur átt við eftir tegund og eðli persónuupplýsinga þinna.

Hljóðritarnir símtala og myndefni sem safnast með eftirlitsmyndavélum er varðveitt í 90 daga og eyðist sjálfkrafa að varðveislutíma liðnum í samræmi við reglur Persónuverndar um rafræna vöktun. Hljóðritun símtala er varða verðbréfaviðskipti eru varðveitt í 5 ár samkvæmt lögum um verðbréfaviðskipti.

Bankinn er afhendingarskyldur aðili samkvæmt lögum um opinber skjalasöfn. Af þeirri ástæðu er bankanum skylt að varðveita öll skjöl í skjalasafni bankans og afhenda þau opinberu skjalasafni þegar skjölin hafa náð 30 ára aldri. Bankinn leitast við að varðveita ekki upplýsingar á persónugreinanlegu formi lengur en nauðsynlegt er og tryggir öryggi upplýsinganna í hvívetna.

Í sérlögum er einnig kveðið á um varðveisluskyldu tiltekinna upplýsinga eins og bókhaldsgagna, persónuskilríkja og annarra upplýsinga sem lög um aðgerðir gegn peningaþvætti og fjármögnun hryðjuverka gera kröfu um. Hljóð- og myndefni sem safnast við rafræna vöktun með eftirlitsmyndavélum og hljóðritun símtala er ekki varðveitt lengur en í 90 daga nema lög kveði á um annað.

Landsbankinn hf., Reykjastræti 6, 101 Reykjavík, ber ábyrgð á að öll meðferð persónuupplýsinga þinna samræmist persónuverndarlögum og reglum og telst ábyrgðaraðili að vinnslu persónuupplýsinga þinna.

Persónuverndarfulltrúi Landsbankans hefur eftirlit með því að farið sé eftir stefnu þessari og gildandi lögum og reglum um persónuvernd í starfsemi bankans. Þú getur beint fyrirspurnum, athugasemdum og ábendingum sem varða vinnslu og meðferð persónuupplýsinga til persónuverndarfulltrúa bankans á netfangið personuvernd@landsbankinn.is.

Bankinn áskilur sér rétt til að uppfæra stefnu þessa með reglubundnum hætti. Bankinn mun upplýsa þig um meiriháttar breytingar á stefnunni áður en þær taka gildi við birtingu á vefsíðu bankans.