Upp­gjör Lands­bank­ans fyr­ir fyrri helm­ing árs­ins 2023

Lilja Björk Einarsdóttir, bankastjóri Landsbankans, segir:

„Rekstur Landsbankans á fyrri helmingi ársins gekk vel og við náðum öllum okkar fjárhagsmælikvörðum. Hagnaður bankans var 14,5 milljarðar króna og arðsemi eigin fjár var 10,3%, sem er í samræmi við langtímamarkmið bankans.

Undanfarið höfum við lagt mikla áherslu á að leiðbeina viðskiptavinum sem eru að glíma við hærri vaxtakostnað og þeim sem eru að leita að betri ávöxtun í verðbólguumhverfi. Við kynntum til leiks nýja verðtryggða Landsbók með styttri binditíma sem hentar vel bæði fyrirtækjum og einstaklingum sem vilja tryggja að sparnaður haldi sem best verðgildi sínu. Við setjumst niður með viðskiptavinum sem glíma við aukinn vaxtakostnað og finnum lausnir saman, hvort sem þær felast í lengingu lánstíma, endurfjármögnun eða öðrum úrræðum.

Flutningar í nýtt hús bankans við Reykjastræti hafa gengið vel og við höfum náð öllum okkar mikilvægustu markmiðum um hagræðingu og nútímalega vinnuaðstöðu sem stuðlar að betri samvinnu. Við erum að flytja úr húsnæði sem er ríflega helmingi stærra og hagræðingin í rekstri er um 600 milljónir króna á ári. Líkt og aðrir sem hafa staðið í byggingarframkvæmdum undanfarið höfum við þurft að takast á við ýmsar áskoranir og teljum að í núverandi umhverfi getum við nokkuð vel við unað þó það sé aldrei ákjósanlegt þegar kostnaður er umfram áætlanir. Líkt og þegar Austurstræti 11 var endurreist fyrir 100 árum, þá byggjum við til framtíðar og það er alveg ljóst að flutningarnir munu skila betri rekstri og öflugri banka. Breytingin er stórkostleg fyrir starfsfólk og það er mín trú að krafturinn og bætt vinnuaðstaða skili sér í enn betri þjónustu við viðskiptavini.

Það er áhugavert að draga saman árangurinn í rekstri bankans undanfarin sex ár sem er tíminn frá því að endanleg ákvörðun var tekin um að byggja húsið í Reykjastræti. Við höfum fækkað fermetrum í rekstri bankans um 36%, stöðugildum hefur fækkað um 20%, stafræn stórsókn hefur bætt þjónustuna enn frekar og við erum stolt af því að hafa mörg útibú og afgreiðslur um land allt. Við erum áfram í mikilli sókn, náum til fleiri viðskiptavina og höfum bætt við öflugum þjónustuþáttum líkt og færsluhirðingu. Landsbankaappið er framúrskarandi, áreiðanlegt og öruggt bankaapp sem viðskiptavinir geta treyst. Bankinn hefur sýnt og sannað að hann er í stöðugri framþróun og viðskiptavinir kunna vel að meta einfaldari og aðgengilegar lausnir.“

Helstu atriði úr rekstri á öðrum ársfjórðungi (2F) 2023

Rekstur:

• Hagnaður Landsbankans á 2F 2023 nam 6,7 milljörðum króna samanborið við hagnað upp á 2,3 milljarða króna á sama ársfjórðungi árið 2022.
• Arðsemi eiginfjár var 9,5% á 2F 2023, samanborið við 3,5% á sama ársfjórðungi árið á undan.
• Hreinar vaxtatekjur á ársfjórðungnum voru 14,5 milljarðar króna en þær námu 11,2 milljörðum króna á 2F 2022.
• Virðisbreyting útlána og krafna var jákvæð um 520 milljónir króna á 2F 2023 samanborið við neikvæða virðisbreytingu upp á 735 milljónir króna á 2F 2022.
• Hreinar þjónustutekjur námu 2,7 milljörðum króna en voru 2,8 milljarðar króna á 2F 2022. 
• Vaxtamunur í hlutfalli af meðalstöðu eigna var 3,0% á 2F 2023 en var 2,6% á sama tímabili árið áður.
• Laun og launatengd gjöld námu 4,2 milljörðum króna samanborið við 3,6 milljarða króna á sama ársfjórðungi 2022.
• Rekstrarkostnaður að frátöldum launum og launatengdum gjöldum nam 2,4 milljörðum króna á 2F 2023 samanborið við 2,1 milljarð króna á sama ársfjórðungi 2022.
• Kostnaður sem hlutfall af tekjum (K/T) á 2F 2023 var 39,5% samanborið við 49,3% á sama ársfjórðungi árið á undan.
• Stöðugildi hjá Landsbankanum þann 30. júní 2023 voru 801 en voru 786 á sama tíma fyrir ári. 

Efnahagur:

• Eigið fé Landsbankans nam 285 milljörðum króna í lok júní 2023.
• Eiginfjárhlutfall bankans (e. total capital ratio) þann 30. júní 2023 var 25,3% en var 24,7% í lok árs 2022. Það er verulega umfram 20,2% eiginfjárviðmið Fjármálaeftirlits Seðlabankans.
• Heildareignir bankans námu 1.896 milljörðum króna í lok júní 2023.
• Útlán jukust um 51 milljarð króna á fyrri helmingi ársins 2023. Útlán til einstaklinga jukust um 10,5 milljarða króna en útlán til fyrirtækja jukust um 40,5 milljarða króna.
• Innlán viðskiptavina námu 1.012 milljörðum króna í lok júní 2023, samanborið við 968 milljarða króna í lok árs 2022.
• Bankinn fylgist náið með og stýrir lausafjáráhættu sinni í heild, í erlendum myntum og í íslenskum krónum. Lausafjárhlutfall bankans (e. liquidity coverage ratio) var 165% í lok júní 2023 samanborið við 134% í lok árs 2022.
• Heildarvanskil fyrirtækja og heimila voru 0,3% af útlánum.

Aðrir þættir í rekstri bankans á fyrri helmingi ársins 2023

• Um áramótin samdi bankinn við Norræna fjárfestingarbankann (NIB) um lán til 15 ára að fjárhæð 40 milljónir Bandaríkjadala í tengslum við nýbyggingu bankans við Reykjastræti í Reykjavík. Lánveitingin fellur undir fjármögnunarramma tengdum umhverfisskuldabréfum NIB.
• Í janúar var tilkynnt að Landsbankinn mældist efstur í Íslensku ánægjuvoginni 2023 hjá viðskiptavinum í bankaþjónustu.
• Við héldum áfram að bjóða upp á fræðslufundi um netöryggi, m.a. í samvinnu við Félag eldri borgara á Akureyri og Blindrafélagið, og voru fundirnir mjög vel sóttir.
• Í febrúar hleyptum við af stokkunum eigin færsluhirðingu sem hefur hlotið frábærar móttökur.
• Í mars seldum við evrópsk sértryggð skuldabréf í úrvalsflokki (e. premium) að fjárhæð 300 milljónir evra og var um að ræða fyrstu útgáfu af þessum toga hjá íslenskum banka.
• Við héldum áfram að auka öryggi í bankaviðskiptum, m.a. með því að biðja um auðkenningu með rafrænum skilríkjum við staðfestingu á greiðslum með greiðslukortum í netverslun.
• Í mars lauk bankinn við útgáfu á tveimur flokkum víkjandi skuldabréfa sem teljast til eiginfjárþáttar 2 og nam fjárhæðin 12 milljörðum króna.
• Aðalfundur Landsbankans sem var haldinn 23. mars samþykkti að greiða um 8,5 milljarða króna í arð til hluthafa. Heildararðgreiðslur bankans á árabilinu 2013-2023 nema þar með 175,1 milljarði króna.
• Við héldum tvö vel heppnuð Fjármálamót, fræðslufundi um fjármál, annars vegar í Stúdentakjallaranum og hins vegar í nýju húsi bankans við Reykjastræti.
• Í hagspánni sem Hagfræðideild Landsbankans gaf út í lok apríl 2023 var gert ráð fyrir meiri hagvexti en í fyrri spám. Ástæðan er einkum sú að horfur í ferðaþjónustu eru betri en áður.
• Í maí kynntum við nýja þjónustu sem felst í því að viðskiptavinir geta notað Landsbankaappið til að velja hvort þeir veiti öðrum skoðunaraðgang að fjármálum sínum eða leyfi til að framkvæma helstu aðgerðir fyrir þeirra hönd.
• Sustainalytics uppfærði UFS-áhættumat bankans. Einkunnin sem bankinn fékk var 8,5 á skala sem nær upp í 100 þar sem lág einkunn er best og þýðir að áhættan er hverfandi.
• Fjöldi fólks lagði leið sína í nýtt hús bankans við Reykjastræti í byrjun maí til að sækja þrjá viðburði bankans í samstarfi við HönnunarMars.
• Frá og með 1. júní höfum við boðið upp á styttri binditíma á verðtryggðum innstæðum, eða 11 mánuði í stað þriggja ára áður.
• Fjárfestadagur Amaroq Minerals var haldinn í Reykjastræti þann 2. júní og tókst vel.
• Sextán framúrskarandi námsmenn hlutu námsstyrki Landsbankans við úthlutun úr Samfélagssjóði bankans í júní.
• Frá því í lok júní hafa viðskiptavinir okkar getað notað Landsbankaappið til að sjá stöðuna á reikningum sínum í öðrum bönkum.
• Í lok júní sögðum við frá því að samið hefði verið um nýtt húsnæði fyrir Landsbankann á Akureyri að Hofsbót 2-4, aðeins steinsnar frá núverandi húsakynnum bankans.