Vikubyrjun 18. nóvember 2024
Við gerum ráð fyrir því að peningastefnunefnd lækki vexti um 0,50 prósentustig á miðvikudaginn. Verðmælingar vegna nóvembermælingar vísitölu neysluverðs fóru fram í síðustu viku, en við spáum því að verðbólga hjaðni úr 5,1% niður í 4,5%. Tæplega 5% fleiri erlendir ferðamenn fóru um Keflavíkurflugvöll í október í ár en í fyrra og kortavelta þeirra hér á landi jókst um 5,4% miðað við fast verðlag. Kortavelta Íslendinga jókst um 6,8% að raunvirði á milli ára í október.
18. nóvember 2024
Vikan framundan
- Á morgun birtir HMS vísitölu íbúðaverðs fyrir október.
- Á miðvikudag er vaxtaákvörðun hjá Seðlabanka Íslands. Við eigum von á 0,50 prósentustiga lækkun. Seðlabankinn birtir nóvemberhefti Peningamála með nýrri hagspá, Iceland Seafood birtir uppgjör, HMS birtir vísitölu leiguverðs og það koma verðbólgutölur frá Bretlandi.
- Á fimmtudag birta Brim, Hampiðjan og Síldarvinnslan uppgjör.
- Á föstudag birtir Hagstofan vísitölu launa fyrir október.
Mynd vikunnar
Alls nam greiðslukortavelta íslenskra heimila 124,4 mö.kr. í október og jókst um 6,8% á milli ára, að teknu tilliti til verðlags og gengis. Innanlands jókst kortavelta íslenskra heimila um 2,7% að raunvirði og erlendis jókst hún um 21,9% á föstu gengi, sé miðað við októbermánuð í fyrra. Í síðasta mánuði virtist farið að hægja á kortaveltu þar sem hún dróst saman innanlands og jókst þó nokkuð minna í heildina en mánuðina á undan. Gögnin virðast vera á mikilli hreyfingu og því förum við varlega í að lesa í sveiflur einstaka mánuði. Áfram ber þó að hafa í huga að heimilin virðast að jafnaði hafa innistæðu til neyslu, innlán hafa aukist og yfirdráttur heimila hefur smám saman dregist saman. Þá verður forvitnilegt að fylgjast með hversu hratt vaxtalækkanir blása lífi í eftirspurn, þótt vaxtastigið sé enn himinhátt.
Það helsta frá vikunni sem leið
- Við spáum því að verðbólga hjaðni úr 5,1% í 4,5% í nóvember, en Hagstofan birtir nóvembermælingu vísitölu neysluverðs fimmtudaginn 28. nóvember. Flugfargjöld til útlanda og reiknuð húsaleiga koma til lækkunar að þessu sinni, en raforkuverð til hækkunar. Við eigum von á áframhaldandi hjöðnun næstu mánuði og að ársverðbólga verði komin niður í 3,5% í febrúar á næsta ári.
- Seðlabankinn birti niðurstöður út væntingakönnun markaðsaðila sem fór fram dagana 4. til 6. nóvember. Markaðaðilar virðast nokkuð bjartsýnni um verðbólgu en í fyrri könnun, en miðgildi spáa um verðbólgu á fjórða ársfjórðungi lækkaði úr 5,7% í ágústkönnuninni í 4,9% í þessari könnun. Miðgildi spáa fyrir fyrstu níu mánuði næsta árs lækkaði úr 4,7% í 3,8% á milli kannana. Markaðsaðilar eru nokkuð einróma um að stýrivextir séu of háir núna, en 87% svarenda töldu taumhald peningastefnu vera of þétt eða alltof þétt í samanburði við 52% í ágústkönnuninni. Miðað við miðgildi svara eiga flestir von á að peningastefnunefnd lækki vexti um 0,50 prósentustig í vikunni.
- 213 þúsund erlendir farþegar fór frá landinu um Keflavíkurflugvöll í október, sem er tæplega 5% fleiri en í október í fyrra. Farþegarnir voru 1.957 þúsund á fyrstu tíu mánuðum ársins, 1,4% fleiri en á sama tímabili í fyrra. Þetta er næst mesti fjöldi erlendra ferðamanna um Keflavíkurflugvöll, en einungis á metferðamannaárinu 2018 voru þeir fleiri. Sem fyrr voru Bandaríkjamenn og Bretar fjölmennastir. Þó fækkaði ferðamönnum af báðum þessum þjóðernum á milli ára á meðan ferðmönnum frá Þýskalandi fjölgaði. Kortavelta ferðamanna hér á landi í október jókst um 5,4% á föstu verðlagi á milli ára.
- Haustskýrsla kjaratölfræðinefndar kom út í vikunni.
- Verðbólga í Bandaríkjunum mældist 2,6% í október. Verðbólga jókst á milli mánaða, úr 2,4% í september, og var í samræmi við væntingar. Kjarnavísitalan, þ.e. verðbólga án sveiflukenndra liða eins og matvæla og orku, var óbreytt í 3,3% á milli mánaða.
- Alvotech, Amaroq, Reitir og Sýn (fjárfestakynning) birtu uppgjör.
- S&P staðfesti lánshæfismat Íslandsbanka og Landsbankans ásamt því að breyta horfum úr stöðugum í jákvæðar. S&P gefur ekki úr lánshæfismat á Arion banka eftir að bankinn hætti samstarfi við matsfyrirtækið fyrr í ár.
- Landsvirkjun birti uppgjör.
- Arion banki gaf út víkjandi skuldabréf í evrum og hélt útboð á sértryggðum skuldabréfum ásamt skiptiútboði. Lánamál ríkisins tilkynntu um niðurstöður viðbótarútgáfu og birtu Markaðsupplýsingar í nóvember. Reykjavíkurborg hélt skuldabréfaútboð. Alma innleysti skuldabréf.
Hagtölur og markaðsupplýsingar
Fyrirvari
Þessi samantekt og/eða umfjöllun er markaðsefni ætlað til upplýsingar en ekki sem grundvöllur viðskipta. Markaðsefni þetta felur hvorki í sér fjárfestingarráðgjöf né óháða fjárfestingargreiningu. Lagakröfur sem gilda um fjárfestingarráðgjöf og fjárfestingargreiningu eiga því ekki við, þ.m.t. bann við viðskiptum fyrir dreifingu.Upplýsingar um þróun gengis innlendra hlutabréfa, skuldabréfa og/eða vísitalna koma frá Nasdaq Iceland – Kauphöllinni. Á vef Landsbankans er hægt að nálgast nánari upplýsingar með því að smella á viðkomandi hlutabréf, skuldabréfaflokk eða vísitölu. Upplýsingar um þróun gengis erlendra fjármálagerninga, vísitalna og/eða sjóða koma frá aðilum sem Landsbankinn hefur metið áreiðanlega. Þróun gengis í fortíð gefur ekki vísbendingu um framtíðarþróun.
Upplýsingar um fyrri árangur sjóða Landsbréfa byggja á upplýsingum frá Landsbréfum. Á vef Landsbankans er hægt að nálgast nánari upplýsingar með því að smella á heiti viðkomandi sjóðs, þ.m.t. um árangur síðastliðinna fimm ára. Upplýsingar um fyrri árangur sjóða sýna nafnávöxtun, nema annað sé tekið fram. Ef fyrri árangur sjóða byggir á erlendum gjaldmiðli getur ávöxtun aukist eða minnkað vegna gengissveiflna. Árangur í fortíð gefur ekki áreiðanlega vísbendingu um framtíðarárangur.
Verðbréfaviðskipti fela í sér áhættu og eru lesendur hvattir til að kynna sér Áhættulýsingu vegna viðskipta með fjármálagerninga og Stefnu Landsbankans um hagsmunaárekstra sem finna má á vef Landsbankans.
Landsbankinn hefur starfsleyfi sem viðskiptabanki samkvæmt lögum nr. 161/2002 um fjármálafyrirtæki og sætir eftirliti Fjármálaeftirlits Seðlabanka Íslands (www.sedlabanki.is/fjarmalaeftirlit).
Þú gætir einnig haft áhuga á
17. jan. 2025
Krónan styrktist á móti evru en veiktist aðeins á móti Bandaríkjadal á árinu 2024. Árið var nokkuð rólegt á millibankamarkaði með gjaldeyri þar sem velta dróst saman og minna var um flökt.
13. jan. 2025
Atvinnuleysi var að meðaltali 3,5% árið 2024, líkt og við spáðum í október. Komur erlendra ferðamanna til Íslands á árinu voru lítillega fleiri en við bjuggumst við, eða tæplega 2,3 milljónir, og desembermánuður var sá fjölmennasti frá upphafi. Í síðustu viku gáfum við út verðbólguspá og gerum ráð fyrir að verðbólga hjaðni úr 4,8% í 4,6% í janúar.
9. jan. 2025
Við spáum því að vísitala neysluverðs lækki um 0,32% á milli mánaða í janúar og að verðbólga hjaðni úr 4,8% í 4,6%. Við búumst við áframhaldandi hjöðnun næstu mánuði og að ársverðbólga verði komin niður í 3,7% í apríl.
6. jan. 2025
Í vikunni birtir Vinnumálastofnun skráð atvinnuleysi í desember og birtar verða tölur um atvinnuleysi í Bandaríkjunum. Einnig fara fram verðmælingar vegna vísitölu neysluverðs, en Hagstofan birtir mælinguna fimmtudaginn 30. janúar.
2. jan. 2025
Mánaðarlegt fréttabréf frá Greiningardeild um nýjustu hagtölur og stöðu og horfur í efnahagsmálum.
19. des. 2024
Vísitala neysluverðs hækkaði um 0,39% á milli mánaða í desember, samkvæmt nýbirtum tölum Hagstofu Íslands. Ársverðbólga stendur því í stað í 4,8%. Við eigum enn von á að verðbólga hjaðni næstu mánuði og verði komin niður í 3,9% í mars.
17. des. 2024
Kortavelta landsmanna færist enn í aukana þrátt fyrir hátt vaxtastig. Innlán heimila hafa vaxið og yfirdráttur ekki aukist. Erlendir ferðamenn hér á landi eyða líka þó nokkuð fleiri krónum en á sama tíma í fyrra.
16. des. 2024
Seðlabankinn hóf vaxtalækkunarferlið í október með 25 punkta lækkun og fylgdi því eftir með 50 punkta lækkun í nóvember. Þetta gerði bankinn rétt fyrir mestu neyslutíð ársins, með öllum sínum tilboðsdögum og jólainnkaupum.
16. des. 2024
Í vikunni fáum við vísitölur íbúðaverðs og leiguverðs frá HMS og vísitölu neysluverðs frá Hagstofunni en við gerum ráð fyrir lítilsháttar hjöðnun verðbólgu úr 4,8% í 4,7%. Um 9,3% fleiri erlendir ferðamenn komu til landsins í nóvember en á sama tíma í fyrra og skráð atvinnuleysi var 0,3 prósentustigum meira en það var í nóvember í fyrra. Seðlabanki Evrópu og Seðlabanki Sviss lækkuðu vexti í síðustu viku og það er vaxtaákvörðun hjá Seðlabanka Bandaríkjanna og Englandsbanka í þessari viku.
12. des. 2024
Um 162.000 ferðamenn komu til landsins í nóvember, samkvæmt talningu ferðamálastofu. Ferðamenn voru 9,3% fleiri en á sama tíma í fyrra og hafa aldrei verið fleiri í nóvembermánuði. Gagnavandamál voru áberandi í ár og tölur um fjölda ferðamanna, erlenda kortaveltu og gistinætur útlendinga hafa allar verið endurskoðaðar á árinu.