Sterkur vinnumarkaður hér á landi eins og víða á Vesturlöndum
Samkvæmt tölum Vinnumálastofnunar var skráð atvinnuleysi í mars 4,9% af áætluðum fjölda fólks á vinnumarkaði. Alls voru 9.608 á atvinnuleysisskrá í lok mars, 5.416 karlar og 4.192 konur. Skráð atvinnuleysi náði hámarki í janúar 2021 þegar það var 11,6% og hefur því minnkað um 6,7 prósentustig.
Vinnumálastofnun spáir því að atvinnuleysi muni verða eilítið minna í aprílmánuði, í kringum 4,5%. Síðustu mánuði hefur atvinnuleysi verið svipað og í upphafi ársins 2020, áður en faraldurinn skall á.
Atvinnuleysi minnkaði mest um 0,6 prósentustig milli mánaða á Vesturlandi og á Suðurnesjum. Atvinnuleysi er áfram langmest á Suðurnesjum. Það hefur nú verið undir 10% á Suðurnesjum í átta mánuði, en fór hæst í 24,5% í mars 2021. Atvinnuleysi kvenna á Suðurnesjum fór í fyrsta skipti niður fyrir 10% í febrúar en hæst fór það í 28,5% í mars 2021.
Atvinnuleysi karla og kvenna minnkaði jafn mikið, um 0,3 prósentustig milli febrúar og mars. Atvinnuleysi karla í mars var 5,0% og 4,7% meðal kvenna. Atvinnuleysi meðal kvenna var meira en karla fram eftir árinu 2021, en í nóvember varð það meira hjá körlum og hefur munurinn aukist lítillega síðan.
Munurinn á atvinnuleysi karla og kvenna er mestur á Suðurnesjum, en þar er atvinnuleysið 1,2 prósentustigum hærra meðal karla. Á Norðurlandi vestra er atvinnuleysi karla 1,1 prósentustigum meira en kvenna.
Fjöldi nýrra auglýstra starfa hjá Vinnumálastofnun jókst nokkuð í mars eftir að hafa verið nokkuð stöðugur síðustu mánuði, á bilinu 4-500. Staðan í mars er því álíka og í september í fyrra þegar átaki í atvinnumálum var að ljúka, en töluvert meira en var í upphafi ársins 2021.
Enn sem komið er flokkast stór hluti þessara starfa sem átaks- og reynsluverkefni. Þannig hafa um þrír fjórðu hlutar nýrra auglýstra starfa verið átaks- og reynsluverkefni fyrstu tvo mánuði ársins 2022. Hæst fór þetta hlutfall í næstum 100% í apríl og maí 2021, en hefur farið lækkandi, reyndar með nokkrum sveiflum.
Atvinnuleysi hefur nú verið svipað í sex mánuði og lítið eitt meira en var í upphafi ársins 2020, áður en faraldurinn skall á. Góður árangur í baráttunni við atvinnuleysið hefur ekki hvað síst náðst með mikilli notkun ráðningarstyrkja. Ráðningarsambönd á grundvelli þessara styrkja hafa haldið nokkuð vel eins og reynsla fyrri ára hefur sýnt.
Baráttan gegn atvinnuleysinu hefur því gengið vel hér eins og víða á Vesturlöndum. Reynslan segir að uppgangur atvinnulífs sem orsakast af kreppum vegna stríðsátaka, náttúruhamfara og faraldra er jafnan mun hraðari en t.d. í fjármálakreppum. Seinni heimstyrjöldin er dæmi um þetta, en í eftir hana var uppgangurinn tiltölulega hraður.
Lesa Hagsjána í heild:
Hagsjá: Sterkur vinnumarkaður hér á landi eins og víða á Vesturlöndum
