Kortavelta ferðamanna aldrei meiri – uppfærðar tölur gefa nýja mynd
![Kortagreiðsla](https://images.prismic.io/landsbankinn/11f68368-58d0-438c-9585-b359c113b41c_Posi-erl-greidslukort.jpg?fit=max&w=3840&rect=0,219,4200,2363&q=50)
Þær hagtölur sem gefa besta mynd af stöðu ferðaþjónustunnar á Íslandi eru fjöldi ferðamanna, fjöldi gistinótta erlendra aðila og kortavelta erlendra greiðslukorta innanlands. Þessir mælikvarðar fylgjast oftast vel að. Síðustu mánuði höfum við tekið tölum um kortaveltu með ákveðnum fyrirvara, þar sem innlend fyrirtæki hafa í auknum mæli nýtt sér erlenda færsluhirðingu sem sást ekki í kortaveltutölum Seðlabankans. Seðlabankinn hefur nú endurskoðað og uppfært aðferð við birtingu á þessum tölum samhliða birtingu kortaveltutalna fyrir júlí og eru þær nú taldar gefa betri mynd. Samkvæmt uppfærðum tölum Seðlabankans hefur erlend kortavelta innanlands aukist um 3,6% á föstu gengi fyrstu sjö mánuði ársins. Það er töluverð breyting frá eldri gögnum sem sýndu 7,3% samdrátt fyrstu sex mánuði ársins.
Eins og við fjölluðum um í nýlegri hagsjá fjölgaði ferðamönnum um 0,5% á milli ára í júlí og það sem af er ári hefur þeim fjölgað um tæplega 1%. Samkvæmt nýbirtum tölum um kortaveltu í júlí jókst hún um 3,8% á milli ára á föstu gengi og hefur aldrei mælst meiri í einum mánuði, eða 47,5 milljarðar króna. Kortavelta á hvern ferðamann jókst því á milli mánaða og hefur aldrei mælst meiri á mann í júlímánuði.
Horfur að batna?
Gistinóttum ferðamanna á skráðum gististöðum hefur þó fækkað um 4% á milli ára fyrstu sex mánuði ársins. Þeim fækkaði þó töluvert minna í júní en mánuðina þar á undan. Gögn um gistinætur eru því aðeins á skjön við þróunina í kortaveltu og fjölda ferðamanna, eins og staðan er núna. Við fáum síðan tölur um gistinætur í júlí í lok mánaðarins.
Almennt má þó segja að þau gögn sem hafa borist fyrir júlímánuð bendi til þess að hann hafi verið kröftugur í ferðaþjónustu. Kortavelta jókst og sömuleiðis fjölgaði ferðamönnum. Þetta bendir til þess að staðan í ferðaþjónustu sé ekki jafn slæm og áður var talið og líkur á samdrætti í greininni eru orðnar minni að okkar mati.
Fyrirvari
Innihald og form þessarar greiningar er unnið af starfsfólki Hagfræðideildar Landsbankans hf. (hagfraedideild@landsbankinn.is) og byggist á aðgengilegum opinberum upplýsingum á þeim tíma sem greiningin var unnin. Mat á þeim upplýsingum endurspeglar skoðanir starfsfólks Hagfræðideildar Landsbankans á þeim degi þegar greiningin er dagsett, en þær geta breyst án fyrirvara.Landsbankinn hf. og starfsfólk hans taka ekki ábyrgð á viðskiptum sem byggð eru á þeim upplýsingum og skoðunum sem hér eru settar fram, enda eru þær ekki veittar sem persónuleg ráðgjöf fyrir einstök viðskipti.
Bent skal á að Landsbankinn hf. getur á hverjum tíma haft beinna eða óbeinna hagsmuna að gæta, ýmist sjálfur, dótturfélög hans eða fyrir hönd viðskiptavina, s.s. sem fjárfestir, lánardrottinn eða þjónustuaðili. Greiningar eru engu að síður unnar sjálfstætt af Hagfræðideild Landsbankans og innan Landsbankans eru í gildi reglur um aðskilnað starfssviða sem eru aðgengilegar á vef bankans.
![Bananar í verslun](https://images.prismic.io/landsbankinn/a3185233-5404-4693-a202-1dc4493032fc_Bananar-1920x1280.jpg?fit=max&w=3840&rect=107,0,1707,1280&q=50)
![](https://images.prismic.io/landsbankinn/812d39a3-e4a4-48e8-b293-01f5b47b9606_Landsbankinn_Irma_Abstrakt_017.jpg?fit=max&w=3840&rect=331,330,881,661&q=50)
![Orlofshús á Íslandi](https://images.prismic.io/landsbankinn/301a973e-b310-481c-924d-f0e655aa7201_Orlofshus-iStock-452517555.jpg?fit=max&w=3840&rect=278,0,4444,3333&q=50)
![](https://images.prismic.io/landsbankinn/fedd0f99-57e5-4a99-a00f-9117bd38fee8_IMG_0744+HIGHRES+1920px.jpg?fit=max&w=3840&rect=326,0,1268,951&q=50)
![Flugvöllur, Leifsstöð](https://images.prismic.io/landsbankinn/b0c57a7a-f73a-448b-8212-7f6ad4d3b4c3_keflavikurflugvollur-1920.jpg?fit=max&w=3840&rect=0,0,1920,1440&q=50)
![](https://images.prismic.io/landsbankinn/028a0757-28f9-4183-b615-499104716808_Landsbankinn_Irma_Abstrakt_018.jpg?fit=max&w=3840&rect=0,140,1168,876&q=50)
![Fataverslun](https://images.prismic.io/landsbankinn/1da63ef3-f754-4e33-85b0-ae3d774b3971_Fataverslun.jpg?fit=max&w=3840&&q=50)
![Epli](https://images.prismic.io/landsbankinn/04574322-2aa9-457d-a6ef-c31bea18abe6_Graen-epli.jpg?fit=max&w=3840&&q=50)
![Evrópsk verslunargata](https://images.prismic.io/landsbankinn/e83ba1d5-c520-4007-8926-cb75f4fd86b8_iStock-1388039756-Holland-verslunargata.jpg?fit=max&w=3840&&q=50)
![Hús í Reykjavík](https://images.prismic.io/landsbankinn/5024e55f-16d3-43f9-b606-ab01dbe5921f_hus-reykjavik-1920.jpg?fit=max&w=3840&&q=50)