Atvinnuleysi minnkar enn og aðflutt vinnuafl sífellt mikilvægara
![Fólk við Geysi](https://images.prismic.io/landsbankinn/dc05dff7-330b-4190-8c14-38cf1de55465_iStock-1131388381-Folk-Geysir-1920.jpg?fit=max&w=3840&rect=1006,651,908,511&q=50)
Skráð atvinnuleysi var 3,1% í ágúst, samkvæmt tölum Vinnumálastofnunar. Það minnkaði úr 3,2% í júlí og að meðaltali fækkaði atvinnulausum um 270. Alls voru 6.118 á atvinnuleysisskrá í lok ágúst. Atvinnuleysið hefur ekki verið jafn lítið síðan í febrúar árið 2019 og Vinnumálastofnun spáir því að það haldist nokkuð stöðugt í september og verði á bilinu 2,9-3,2%.
Langtímaatvinnulausum, þeim sem hafa leitað að vinnu lengur en í eitt ár, fjölgaði engu að síður örlítið milli mánaða. Nú eru 2.395 í þeim hópi, þó rúmlega helmingi færri en í ágúst í fyrra.
Atvinnuleysi áfram mest á Suðurnesjum
Atvinnuleysi hefur minnkað eða staðið í stað í öllum landshlutum, að undanskildum Vestfjörðum, þar sem það jókst um 0,1 prósentustig milli mánaða. Það er áfram mest á Suðurnesjum, eða 5,3%, en þar fór það hæst upp í 24,5% þegar þrengdi sem mest að ferðaþjónustunni í faraldrinum. Næstmest er atvinnuleysi á höfuðborgarsvæðinu, 3,4%. Atvinnuleysi er minnst á Norðurlandi vestra, aðeins 0,7%, og næstminnst á Austurlandi, 1,3%.
Ferðafólki fjölgar og atvinnuleysi í ferðagreinum minnkar mest
Atvinnulausum fækkaði í öllum atvinnugreinum í ágúst, mest í ferðatengdum greinum, um 18% milli mánaða, enda hefur erlendum ferðamönnum haldið áfram að fjölga eftir því sem liðið hefur á sumarið. Í ágúst ferðuðust 241 þúsund erlendir ferðamenn frá Keflavíkurflugvelli, 9 þúsundum fleiri en í júlí. Í ágúst 2018, þegar fjöldi ferðamanna var í sögulegu hámarki, flugu héðan 287 þúsund erlendir ferðamenn. Uppgang ferðaþjónustunnar má líka lesa úr tölum Hagstofunnar um gistinætur á hótelum. Tölur yfir ágústmánuð eru ekki komnar, en gistinætur hafa aldrei verið fleiri en í júlí, rúm ein og hálf milljón.
Einnig dró úr atvinnuleysi í ýmiss konar opinberri þjónustu, um 17%, og í upplýsingatækni og útgáfu minnkaði það um 16%.
Aðflutt starfsfólk mætir þörf á vinnuafli
Frá árinu 2007 hafa aldrei fleiri fyrirtæki talið vanta starfsfólk og ljóst er að aðflutt starfsfólk er nauðsynlegt til að mæta aukinni eftirspurn eftir vinnuafli á Íslandi.
Því er ekki furða að erlendum ríkisborgurum fjölgi ört, en fjöldinn stóð nokkurn veginn í stað yfir Covid-mánuðina. Greint var frá því í ágúst að aldrei hefðu fleiri flutt til landsins á einum ársfjórðungi en á öðrum ársfjórðungi þessa árs. Í lok júní bjuggu hér á landi 59.460 erlendir ríkisborgarar, samkvæmt nýjustu tölum Hagstofu Íslands, sjö þúsund fleiri en á sama tíma á síðasta ári. Starfandi innflytjendur hér á landi eru 48 þúsund talsins.
Langstærstur hluti innflytjenda á Íslandi starfar í greinum tengdum ferðaþjónustu en nokkur fjöldi einnig í byggingariðnaði, þar sem umsvif hafa snaraukist á síðustu mánuðum og þeim fjölgað sem starfa í greininni.
Fyrirvari
Innihald og form þessarar greiningar er unnið af starfsfólki Hagfræðideildar Landsbankans hf. (hagfraedideild@landsbankinn.is) og byggist á aðgengilegum opinberum upplýsingum á þeim tíma sem greiningin var unnin. Mat á þeim upplýsingum endurspeglar skoðanir starfsfólks Hagfræðideildar Landsbankans á þeim degi þegar greiningin er dagsett, en þær geta breyst án fyrirvara. Landsbankinn hf. og starfsfólk hans taka ekki ábyrgð á viðskiptum sem byggð eru á þeim upplýsingum og skoðunum sem hér eru settar fram, enda eru þær ekki veittar sem persónuleg ráðgjöf fyrir einstök viðskipti. Bent skal á að Landsbankinn hf. getur á hverjum tíma haft beinna eða óbeinna hagsmuna að gæta, ýmist sjálfur, dótturfélög hans eða fyrir hönd viðskiptavina, s.s. sem fjárfestir, lánardrottinn eða þjónustuaðili. Greiningar eru engu að síður unnar sjálfstætt af Hagfræðideild Landsbankans og innan Landsbankans eru í gildi reglur um aðskilnað starfssviða sem eru aðgengilegar á vef bankans.![Flutningaskip](https://images.prismic.io/landsbankinn/0726d233-96f0-40e5-b26c-7c51ce7e3b01_Loftmynd-flutningaskip.jpg?fit=max&w=3840&rect=290,0,1731,1298&q=50)
![Hús í Reykjavík](https://images.prismic.io/landsbankinn/87ed3177-9369-4059-a8fe-03efa50f12a3_reykjavik-backyard-traditional-houses-iStock-1247730448-1920.jpg?fit=max&w=3840&&q=50)
![Rafbíll í hleðslu](https://images.prismic.io/landsbankinn/71496b34-4d94-4f7a-8c8a-343024257f9f_Rafbilagrein-juni-2021-iStock-1083483102.jpg?fit=max&w=3840&rect=292,0,4667,3500&q=50)
![](https://images.prismic.io/landsbankinn/f914dab3-8c34-11e9-9109-005056be2922.jpg?fit=max&w=3840&rect=83,0,1335,1001&q=50)
![](https://images.prismic.io/landsbankinn/35de1bcf-c5e3-4cd3-ae60-cf32894ad792_LB_Office_11200+1920px.jpg?fit=max&w=3840&rect=107,0,1707,1280&q=50)
![Kortagreiðsla](https://images.prismic.io/landsbankinn/11f68368-58d0-438c-9585-b359c113b41c_Posi-erl-greidslukort.jpg?fit=max&w=3840&rect=233,0,3733,2800&q=50)
![Bananar í verslun](https://images.prismic.io/landsbankinn/a3185233-5404-4693-a202-1dc4493032fc_Bananar-1920x1280.jpg?fit=max&w=3840&rect=107,0,1707,1280&q=50)
![](https://images.prismic.io/landsbankinn/812d39a3-e4a4-48e8-b293-01f5b47b9606_Landsbankinn_Irma_Abstrakt_017.jpg?fit=max&w=3840&rect=331,330,881,661&q=50)
![Orlofshús á Íslandi](https://images.prismic.io/landsbankinn/301a973e-b310-481c-924d-f0e655aa7201_Orlofshus-iStock-452517555.jpg?fit=max&w=3840&rect=278,0,4444,3333&q=50)
![](https://images.prismic.io/landsbankinn/fedd0f99-57e5-4a99-a00f-9117bd38fee8_IMG_0744+HIGHRES+1920px.jpg?fit=max&w=3840&rect=326,0,1268,951&q=50)