Ný lög um fjár­mála­gern­inga – þú þarft mögu­lega að bregð­ast við

Lögunum er ætlað að efla fjárfestavernd, gagnsæi í viðskiptum og fleira sem viðkemur viðskiptum með fjármálagerninga sem teknir hafa verið á markað, s.s. hlutabréf, kauphallarsjóði og skuldabréf.

Hvað þurfa lögaðilar að gera?

Eftir gildistöku laganna þurfa lögaðilar sem ætla að eiga viðskipti með fjármálagerninga sem teknir hafa verið til viðskipta á markaði að afla sér alþjóðlegs LEI-kóða hjá viðurkenndum útgefendum erlendis.

Upplýsingar um LEI-kóða lögaðila þarf að senda í tölvupósti á netfangið lei@landsbankinn.is ásamt nafni lögaðila og íslenskri kennitölu.

Nánar um LEI-kóða

Hvað þurfa einstaklingar að gera?

Ef þú ert einstaklingur með annað ríkisfang en íslenskt eða ert með tvöfalt ríkisfang, þarftu að upplýsa Landsbankann um alla erlendu NCI-kóðana þína til að þú getir átt viðskipti með fjármálagerninga sem teknir hafa verið til viðskipta á markaði. Einstaklingar sem eingöngu hafa íslenskt ríkisfang þurfa ekki að upplýsa um NCI-kóða sinn.

Upplýsingar um NCI-kóða einstaklinga þarf að senda í tölvupósti á netfangið nci@landsbankinn.is ásamt nafni og íslenskri kennitölu.

Reglur um NCI-kóða eru misjafnar á milli landa. Við erum með frekari upplýsingar á vefnum okkar en ef þú lendir í vandræðum hvetjum við þig til að hafa samband við okkur.

Nánar um NCI-kóða

Nánar um kóðana

LEI-kóðar og NCI-kóðar eru nauðsynlegir vegna viðskipta með hlutabréf, kauphallarsjóði og skuldabréf sem skráð eru á markað, t.d. Nasdaq Iceland og First North. Ekki er þörf á þessum kóðum ef viðskiptavinur ætlar eingöngu að eiga viðskipti með sjóði Landsbréfa, að undanskildum kauphallarsjóðnum Landsbréf LEQ UCITS ETF.