Helgi Áss Íslandsmeistari eftir sigur á Friðriksmóti Landsbankans
Stórmeistarinn Helgi Áss Grétarsson kom, sá og sigraði á Friðriksmóti Landsbankans, Íslandsmótinu í hraðskák, sem fram fór 1. desember í Landsbankanum í Reykjarstræti.
Í upphafi mótsins var flutt kveðja frá Friðriki Ólafssyni, sem átti ekki heimangengt. Hann brýndi keppendur og þakkaði Landsbankanum fyrir að hafa stutt við mótið í rúma tvo áratugi.
Bergsteinn Einarsson, framkvæmdastjóri Áhættustýringar Landsbankans, lék fyrsta leikinn fyrir Jóhann Hjartarson gegn Haraldi Björnssyni. Klappað var fyrir Bergsteini þegar hann upplýsti að bankinn myndi áfram styðja við mótið.
Helgi Áss mætti til leiks á hækjum eftir lítils háttar aðgerð og sat á föstu fjórða borði vegna þess. Þar tók hann á móti andstæðingum sínum og afgreiddi þá flesta, leyfði aðeins þrjú jafntefli og vann 10 skákir sem er frábær árangur. Alls hlaut hann 11,5 vinninga og var í kjölfarið krýndur Íslandsmeistari í hraðskák.
Alþjóðlegi meistarinn Hilmir Freyr Heimisson hlaut 11 vinninga – skor sem í flestum tilfellum myndi duga til sigurs. Hann tapaði fyrir Helga Áss og Stephani Briem en vann alla aðra. Stephan, Davíð Kolka og Birkir Ísak Jóhannsson hlutu 9 vinninga og hrepptu 3.-5. sæti. Félagsmenn í Breiðabliki tóku fjögur af fimm aðalverðlaunum mótsins! Oliver Aron Jóhannsson og Magnús Pálmi Örnólfsson fengu einnig 9 vinninga en höfðu lægri oddastig.
Aukaverðlaununum var fækkað að þessu sinni en þau hækkuð. Lenka Ptácníková hlaut kvennaverðlaunin, eins og svo oft áður. Árangursverðlaun (besti árangur miðað við eigin stig) voru veitt. Miðað var við undir 2.000 skákstig og yfir.
Örvar Hólm Brynjarsson hlaut verðlaunin fyrir þá sem höfðu undir 2.000 skákstig. Stefán Bergsson fékk verðlaun fyrir bestan árangur þeirra sem höfðu meira en 2.000 skákstig. Reyndar höfðu Helgi Áss og Davíð Kolka betri árangur en hann þar en ekki var hægt að fá tvenn verðlaun.
Alls tóku 77 skákmenn þátt í mótinu og var gaman að sjá hvað unga kynslóðin stóð sig vel. Skákstjórar voru Gunnar Björnsson, Ingvar Þór Jóhannesson og Daði Ómarsson. Sá síðastnefndi hélt einnig utan um beinar útsendingar. Einnig komu Björn Ívar Karlsson, Jóhanna Björg Jóhannsdóttir og Róbert Lagerman að undirbúningi mótsins.
Íslandsmótið í atskák fer fram í Bankanum vinnustofu, sem er í Landsbankahúsinu á Selfossi, þann 7. desember nk.
