Ný þjóðhagsspá: Ekki sér fyrir endann á uppsveiflunni
Í nýrri þjóðhagsspá Hagfræðideildar Landsbankans er gert ráð yfir að hagvöxtur verði áfram kröftugur allt spátímabilið 2017-2020 þótt útlit sé fyrir að hagkerfið sé nú nálægt toppi hagsveiflunnar.
Nýja þjóðhags- og verðbólguspáin er birt í Þjóðhag, ársriti Hagfræðideildar. Ritið er eingöngu birt í vefútgáfu á Umræðunni, efnis- og fréttaveitu Landsbankans, og er þetta í fyrsta skipti sem ritið er eingöngu gefið út á rafrænu formi.
Nýja hagspáin var kynnt á morgunfundi Landsbankans í Silfurbergi Hörpu
Hagvöxtur verður að meðaltali 4% og verðbólga 2,7%
Hagfræðideild gerir ráð fyrir að árlegur hagvöxtur á árunum 2017-2020 verði að meðaltali 4%, sem er mun kröftugri vöxtur en reiknað er með í flestum þróuðum ríkjum á komandi árum. Samkvæmt spánni verður hagvöxtur 5,5% á þessu ári en fer svo stiglækkandi til ársins 2020 þegar gert er ráð fyrir 2,5% hagvexti. Hagfræðideild spáir því að einkaneysla vaxi samfellt allt tímabilið en að á næstu tveimur árum dragi smám saman úr atvinnuvegafjárfestingu. Á hinn bóginn er reiknað með kröftugum vexti í íbúðafjárfestingu og opinberri fjárfestingu allt spátímabilið.
Í spánni er reiknað með að verðbólga hækki smám saman í átt að 2,5% verðbólgumarkmiði Seðlabankans. Hækkun fasteignaverðs og hækkandi innflutningsverð munu að öllum líkindum ýta verðbólgunni upp fyrir verðbólgumarkmiðið um mitt ár 2019. Að meðaltali verður verðbólga um 2,7% á tímabilinu 2017-2020.
Nýjar íbúðir stærri og fermetraverð hærra en eldri íbúða
Í spánni er fjallað um ýmsa þætti efnahagslífsins, s.s. þróun fasteignaverðs, fjárfestingar, einkaneyslu, samneyslu, vaxtaþróun, gengi krónunnar og um alþjóðlega þróun efnahagsmála.
Í umfjöllun um fasteignaverð kemur m.a. fram að ef litið er á viðskipti með íbúðir á síðustu tveimur árum sést að nýjar íbúðir eru að jafnaði bæði stærri og fermetraverð hærra en í eldri íbúðum. Einingaverð á nýjum íbúðum er þannig mun hærra en á þeim eldri. Því er ekki líklegt að aukið framboð nýrra íbúða leiði til verðlækkana á fasteignum. Hagfræðideild spáir 19% hækkun fasteignaverðs milli áranna 2016 og 2017. Síðan færist meiri ró yfir markaðinn og verð hækkar um 8,5% á árinu 2018, 7% árið 2019 og 6% árið 2020.
![](https://images.prismic.io/landsbankinn/Zsxc_UaF0TcGJY-i_elvar-thor-karlsson.jpg?fit=max&w=3840&rect=240,0,1440,1080&q=50)
![Sigurður Árni Sigurðsson](https://images.prismic.io/landsbankinn/Zp_WmB5LeNNTxboe_SK-LB2024_BK211163.png?fit=max&w=3840&rect=150,0,2404,1803&q=50)
![](https://images.prismic.io/landsbankinn/ZsiRJEaF0TcGJW-b_LB_Menningarnott_2024_1920x1080.jpg?fit=max&w=3840&&q=50)
![Eystra horn](https://images.prismic.io/landsbankinn/918043a6-cbf1-47cb-bc18-c7f87bee94a8_Landsbref-fjall.jpg?fit=max&w=3840&rect=87,0,1708,1281&q=50)
![Flutningaskip við Vestmannaeyjar](https://images.prismic.io/landsbankinn/eb63e91b-2dd7-49e6-b216-7219f2044d85_Flutningaskip-1920.jpg?fit=max&w=3840&&q=50)
![Netbanki](https://images.prismic.io/landsbankinn/92e7a426-af51-430b-95d2-9ceeef1f1d2a_Tolva-2023-Netbanki-einstaklinga.png?fit=max&w=3840&&q=50)
![](https://images.prismic.io/landsbankinn/ZpUzJh5LeNNTxKWz_landsbankinn_gay_pride-5_medium1600x1067.jpg?fit=max&w=3840&&q=50)
![Stúlka með síma](https://images.prismic.io/landsbankinn/c8831a3c-db04-49f2-9649-78176beedd34_5U3A4396_graded.jpg?fit=max&w=3840&&q=50)
![Menningarnótt 2023](https://images.prismic.io/landsbankinn/4bf21ee8-baa5-41e4-9ce2-d6163a24466b_LANDSBANKI_menningarnott_13.jpg?fit=max&w=3840&&q=50)
![Austurbakki](https://images.prismic.io/landsbankinn/ced8837c-715d-4bd8-921f-a043ee61f45e_Austurbakki.png?fit=max&w=3840&&q=50)