Upp­gjör Lands­bank­ans fyr­ir fyrstu þrjá mán­uði árs­ins 2023

Lilja Björk Einarsdóttir, bankastjóri Landsbankans, segir:

„Sterkt uppgjör Landsbankans á fyrsta ársfjórðungi er til marks um öflugan rekstur og góðan árangur á öllum sviðum. Útlán bankans hafa aukist um 160 milljarða króna á síðustu 12 mánuðum sem skilar meiri vaxtatekjum. Samsetning efnahags bankans er hagkvæmari en áður og vaxtastig hefur hækkað, sem skilar meðal annars betri ávöxtun af lausafé bankans. Fjölgun viðskiptavina, nýir þjónustuþættir og aukin verkefni, til að mynda hjá Fyrirtækjaráðgjöf Landsbankans, skila auknum þjónustutekjum og færsluhirðing bankans, sem var kynnt á fyrsta fjórðungi, hefur fengið afar góðar viðtökur.

Það var einkar ánægjulegt hversu vel tókst til með útgáfu á 300 milljóna evru skuldabréfi sem bankinn gaf út í byrjun mars. Þá tóku innlendir fjárfestar víkjandi skuldabréfi bankans vel og fjárfestu fyrir 12 milljarða króna en áður hafði bankinn samið við Norræna fjárfestingarbankann um langtímalán upp á 40 milljónir Bandaríkjadala í tengslum við vænta BREEAM-umhverfisvottun á nýju húsi bankans við Reykjastræti. Áfram er óróleiki á erlendum fjármálamörkuðum sem hefur neikvæð áhrif á vaxtakjör bankans í erlendri mynt.

Aukin verðbólga og hátt vaxtastig halda áfram að vera áskorun þótt vanskil séu samt sem áður enn mjög lítil. Útlánavöxtur er enn nokkuð kröftugur og skiptir þar mestu að útflutningsgreinarnar standa vel en einnig skapar ör fólksfjölgun eftirspurn eftir húsnæði. Bankinn fjármagnar nú um 4.500 íbúðir á mismunandi byggingarstigum en fasteignalán hafa ekki aukist að sama skapi þar sem kaupendur sækja frekar í verðtryggð lán utan bankakerfisins. Við munum sem fyrr kappkosta að bjóða samkeppnishæf kjör, bæði á útlánum og innlánum.

Mikil tímamót urðu í sögu bankans í mars þegar við hófum flutning úr Kvosinni, þar sem Landsbankinn hefur verið frá árinu 1898, í nýtt hús bankans við Reykjastræti 6. Flutningarnir hafa gengið vel og þegar þeim lýkur síðar í þessum mánuði mun um 80% af starfsfólki bankans vinna saman undir einu þaki, í stað þess að dreifast á 14 hús í Kvosinni og Borgartúni. Starfsaðstaðan í nýja húsinu er framúrskarandi og flutningunum fylgir mikil tilhlökkun og ánægja meðal starfsfólks. Við höfum lengi haft það markmið að skapa vinnustað framtíðarinnar og búa þannig vel að starfsfólki. Krafturinn sem skapast þegar við erum öll undir sama þaki gerir okkur að betri banka og hjálpar okkur við að einfalda líf viðskiptavina. Við fögnum því að í mars notuðu fleiri en nokkru sinni fyrr appið okkar - það er frábært veganesti inn í sumarið. Það er til margs að hlakka og heilmikið framundan hjá okkur í nýrri þjónustu fyrir einstaklinga og fyrirtæki.“

Helstu atriði úr rekstri á fyrsta ársfjórðungi (1F) 2023

Rekstur:

• Hagnaður Landsbankans á 1F 2023 nam 7,8 milljörðum króna samanborið við hagnað upp á 3,2 milljarða króna á sama ársfjórðungi árið 2022.
• Arðsemi eiginfjár var 11,1% á 1F 2023, samanborið við 4,7% á sama ársfjórðungi árið á undan.
• Hreinar vaxtatekjur á ársfjórðungnum voru 13,1 milljarður króna en þær námu 10,3 milljörðum króna á 1F 2022.
• Virðisbreyting útlána og krafna var neikvæð um 2,1 milljarð króna á 1F 2023 samanborið við jákvæða virðisbreytingu upp á 0,8 milljarða króna á 1F 2022.
• Hreinar þjónustutekjur námu 3,0 milljörðum króna en voru 2,6 milljarðar króna á 1F 2022. 
• Vaxtamunur í hlutfalli af meðalstöðu eigna var 2,8% á 1F 2023 en var 2,4% á sama tímabili árið áður. 
• Laun og launatengd gjöld námu 4,1 milljarði króna samanborið við 3,8 milljarða króna á sama ársfjórðungi 2022.
• Rekstrarkostnaður að frátöldum launum og launatengdum gjöldum nam 2,9 milljörðum króna á 1F 2023 sem er sama fjárhæð og á sama ársfjórðungi 2022.
• Kostnaður sem hlutfall af tekjum (K/T) á 1F 2023 var 33,3%, samanborið við 54,9% á sama ársfjórðungi árið á undan.
• Stöðugildi hjá Landsbankanum þann 31. mars 2023 voru 825 en voru 791 á sama tíma fyrir ári. 

Efnahagur:

• Eigið fé Landsbankans í lok fyrsta ársfjórðungs 2023 var 278,3 milljarðar króna sem er 0,7 milljörðum króna lægra en í árslok 2022.
• Þann 29. mars 2023 var greiddur út fyrri hluti arðgreiðslu til hluthafa að fjárhæð 4.251 milljón króna. Síðari hluti arðgreiðslunnar að fjárhæð 4.251 milljón króna verður greiddur þann 20. september 2023.
• Eiginfjárhlutfall bankans (e. total capital ratio) í lok fyrsta ársfjórðungs 2023 var 25,3% en var 24,7% í lok árs 2022. Það er verulega umfram 20,8% eiginfjárkröfufjármálaeftirlits Seðlabankans.
• Heildareignir bankans námu 1.917 milljörðum króna í lok mars 2023.
• Útlán jukust um 32,2 milljarða króna á fyrstu þremur mánuðum ársins 2023. Útlán til einstaklinga jukust um 6,8 milljarða króna og útlán til fyrirtækja um 31,6 milljarða króna en þar af eru 6,2 milljarðar króna áhrif gengis.
• Innlán viðskiptavina námu 1.001,6 milljörðum króna í lok mars 2023, samanborið við 967,9 milljarða króna í lok árs 2022.
• Bankinn fylgist náið með og stýrir lausafjáráhættu sinni í heild, í erlendum myntum og í íslenskum krónum. Lausafjárhlutfall bankans (e. liquidity coverage ratio) var 235% í lok mars 2023 samanborið við 134% í lok árs 2022.
• Heildarvanskil fyrirtækja og heimila voru 0,3% af útlánum.