Þann 5. mars 2024 lauk Landsbankinn við sölu á grænum skuldabréfum að fjárhæð 300 milljónir evra. Um var að ræða fjórðu útgáfu bankans á grænum skuldabréfum í evrum.
Skuldabréfin bera 5,0% fasta vexti og voru seld á kjörum sem jafngilda 225 punkta álagi á miðgildi vaxtatilboða í vaxtaskiptasamningum á markaði. Þetta eru hagstæðustu kjör sem hafa fengist í evruútgáfu íslensks banka frá árinu 2022. Skuldabréfin eru gefin út til rúmlega fjögurra ára með lokagjalddaga í maí 2028.
Heildareftirspurn var rúmlega sexföld en hún nam yfir 2.000 milljónum evra, frá yfir 150 fjárfestum frá Bretlandi, Norðurlöndunum, meginlandi Evrópu og Asíu.
Skuldabréfin verða gefin út undir EMTN-útgáfuramma bankans með vísan í sjálfbæra fjármálaumgjörð bankans sem vottuð er af Sustainalytics. Stefnt er að því að skuldabréfin verði tekin til viðskipta í írsku kauphöllinni 13. mars 2024.
Umsjónaraðilar með útgáfunni voru ABN AMRO Bank, Barclays Bank, BofA Securities og Goldman Sachs Bank Europe.
