27. febrúar 2023
Vikan framundan
- Í dag birtir Hagstofan febrúarmælingu vísitölu neysluverðs.
- Á morgun birtir Hagstofan fyrsta mat á landsframleiðslu í fyrra. Eik birtir uppgjör.
- Á fimmtudag birtir Seðlabankinn tölur um greiðslujöfnuð við útlönd og erlenda stöðu þjóðarbúsins. Alvotech birtir ársuppgjör.
Mynd vikunnar
Í janúar voru 280 kaupsamningar um íbúðarhúsnæði gefnir út á höfuðborgarsvæðinu og hafa þeir ekki verið færri síðan í janúar 2011. Til samanburðar voru 485 kaupsamningar undirritaðir í janúar í fyrra, en janúarmánuður er oft rólegur á íbúðamarkaði. Hafa ber í huga að tölurnar eru bráðabirgðatölur og því gæti talan átt eftir að hækka eftir því sem fleiri kaupsamningar berast í gagnagrunn HMS.
Helsta frá vikunni sem leið
- Íbúðaverð á höfuðborgarsvæðinu lækkaði um 0,5% milli mánaða í janúar. Þetta er þriðji mánuðurinn í röð sem vísitalan lækkar milli mánaða, en svo löng samfelld lækkun hefur ekki sést síðan við lok árs 2009. Þessi mæling og þróun síðustu mánaða benda til þess að markaðurinn sé að kólna umtalsvert. Hagdeild HMS birti mánaðarskýrslu um íbúðamarkaðinn.
- Seðlabankinn birti í síðustu viku fundargerð peningastefnunefndar vegna stýrivaxtaákvörðunarinnar 8. febrúar. Nefndin ræddi hækkanir á bilinu 0,5 til 1,0 prósentustig, en við gerðum ráð fyrir að nefndin myndi ræða hækkun um 0,25 til 0,75 prósentustig. Allir nefndarmenn greiddu atkvæði með 0,5%. Einn nefndarmaður, Herdís Steingrímsdóttir, lét bóka að hún hefði frekar kosið að hækka um 0,75 prósentustig. Herdís kom inn í nefndina fyrir tæpu ári og þetta er í fyrsta sinn sem hún skilar séráliti.
- Launavísitalan hækkaði um 0,2% milli desember 2022 og janúar 2023 samkvæmt tölum Hagstofu Íslands. Síðustu 12 mánuði hefur launavísitalan hækkað um 8,6%.
- Velta samkvæmt VSK-skýrslum jókst milli ára í öllum helstu atvinnugreinum í fyrra. Það þarf ekki að koma á óvart að mesta aukningin var í greinum tengdum ferðaþjónustu. Alls jókst velta í einkennandi greinum ferðaþjónustu um 85% milli ára.
- Samkvæmt fyrsta mati Hagstofu Íslands mældist 54 ma. kr. halli af vöru- og þjónustuviðskiptum í fyrra sem er mesti halli sem mælst hefur síðan árið 2007. Það var veglegur afgangur af þjónustujöfnuði, aðallega drifinn áfram af ferðaþjónustu, en sá afgangur dugði ekki til þess að vinna upp hallann af vöruskiptajöfnuðinum.
- Uppgjörstímabil stendur nú yfir, en Brim, Iceland Seafood og VÍS (fjárfestakynning) birtu ársuppgjör. Auk þess birtu Landsvirkjun og Alma íbúðafélag uppgjör.
- Tvö útboð voru í síðustu viku. Íslandsbanki hélt útboð á grænum skuldabréfum og Útgerðarfélag Reykjavíkur hélt útboð á víxlum.
Hagtölur og markaðsupplýsingar
Þú gætir einnig haft áhuga á
10. júlí 2024
Við spáum því að vísitala neysluverðs hækki um 0,15% á milli mánaða í júlí og að verðbólga aukist úr 5,8% í 5,9%. Við gerum ráð fyrir að júlímánuður verði nokkuð dæmigerður þar sem sumarútsölur verða til lækkunar á vísitölunni en flugfargjöld til útlanda til hækkunar. Við spáum nokkurn veginn óbreyttri verðbólgu í ágúst og september, en að verðbólga hjaðni í 5,4% í október.
8. júlí 2024
Hátt vaxtastig hefur hvatt til sparnaðar og hægt á eftirspurn í hagkerfinu. Innlán heimila voru 20% meiri í maí síðastliðnum en í maí í fyrra, samkvæmt nýbirtum Hagvísum Seðlabanka Íslands. Óbundin innlán hafa aukist langmest.
1. júlí 2024
Mánaðarlegt fréttabréf frá Hagfræðideild um nýjustu hagtölur og stöðu og horfur í efnahagsmálum.
1. júlí 2024
Vísitala neysluverðs hækkaði um 0,48% í júní. Verðbólga mældist því 5,8% og lækkaði úr 6,2%. Velta samkvæmt virðisaukaskattsskýrslum í mars og apríl dróst saman um 4,6% að raunvirði og launavísitalan hækkaði um 0,2% í maí, samkvæmt tölum sem Hagstofan birti í síðustu viku.
27. júní 2024
Vísitala neysluverðs hækkaði um 0,48% á milli mánaða í júní og við það lækkaði ársverðbólga úr 6,2% í 5,8%. Reiknuð húsaleiga, hækkandi flugfargjöld til útlanda og verðhækkun á hótelgistingu höfðu mest áhrif til hækkunar á vísitölunni. Á móti lækkaði verð á fötum og skóm, húsgögnum og heimilisbúnaði og ökutækjum á milli mánaða í júní.
25. júní 2024
Velta samkvæmt virðisaukaskattsskýrslum dróst saman um 4,6% að raunvirði í mars og apríl og um 2% í janúar og febrúar samkvæmt nýbirtum gögnum Hagstofunnar. Þróunin er ólík eftir útflutningsgreinum. Ferðaþjónusta eykst lítillega á milli ára, velta í sjávarútvegi og álframleiðslu minnkar en velta í lyfjaframleiðslu eykst til muna.
25. júní 2024
Atvinnuleysi er nú aðeins meira en á sama tíma í fyrra og laun hækka minna. Nýbirt launavísitala sýnir 0,2% hækkun á milli mánaða í maí og hafa laun nú hækkað um 6,7% á síðustu tólf mánuðum. Allar líkur eru á að á þessu ári hækki laun mun minna en á síðasta ári, enda hafa nýir kjarasamningar minni hækkanir í för með sér en þeir síðustu.
24. júní 2024
Vísitala íbúðaverðs hækkaði um 1,4% í maí og vísitala leiguverðs um 3,2% samkvæmt gögnum sem bárust í síðustu viku. Englandsbanki hélt vöxtum óbreyttum á meðan svissneski seðlabankinn lækkaði vexti um 0,25 prósentustig. Eftirtektarverðasta innlenda hagtalan sem birtist í þessari viku er eflaust vísitala neysluverðs sem Hagstofan birtir á fimmtudaginn.
19. júní 2024
Vísitala íbúðaverðs hækkaði um 1,4% á milli mánaða í maí. Nafnverð íbúða er 8,4% hærra en á sama tíma í fyrra og raunverð íbúða er 4% hærra. Undirritaðir kaupsamningar um íbúðir á höfuðborgarsvæðinu voru 150% fleiri í maí á þessu ári en í maí í fyrra.
18. júní 2024
Í síðustu viku fengum við tölur um atvinnuleysi, fjölda ferðamanna og greiðslukortaveltu hér á landi í maí. Seðlabanki Bandaríkjanna hélt vöxtum óbreyttum. Síðar í dag birtir HMS vísitölu íbúðaverðs.