Kortasvik hafa aukist í takti við aukna notkun kortanna á netinu. Því er mikilvægt að korthafar geri ráðstafanir til að auka öryggi sitt í netviðskiptum.
1. Varist fölsk SMS og falska tölvupósta
Mörg svikamál snúast um fölsk SMS eða falska tölvupósta sem sendir eru í nafni vefverslana eða flutningafyrirtækja. Ef smellt er á hlekkinn birtist fölsk síða þar sem fólk er beðið um kortanúmer og öryggisnúmer kortsins. Jafnvel eru dæmi um að hringt sé í fólk og reynt að blekkja það til að veita þessar upplýsingar.
2. Lestu auðkenningar í rafrænum skilríkjum með staðfestingu á netgreiðslum vel og vandlega
Þegar þú notar Visa-kortið hjá vefverslunum sem eru með merkið „Verified by Visa“ færð þú senda auðkenningu í rafrænu skilríkin á símanum þínum. Það er algjört lykilatriði að lesa auðkenninguna vel og ganga úr skugga um að allar upplýsingar, þ.m.t. um upphæð og gjaldeyri, séu réttar áður en hún er samþykkt.
- Er söluaðilinn sá aðili sem þú varst að versla við?
- Er fjárhæðin í skilaboðunum í þeim gjaldmiðli sem þú notaðir við kaupin?
- Passar fjárhæðin sem þú verslaðir fyrir, við þá fjárhæð sem fylgir í auðkenningunni í rafrænum skilríkjum?
3. Sláðu inn slóðina – ekki smella á hlekki
Ekki smella á hlekki sem þú færð í pósti eða í auglýsingum á netinu. Farðu frekar beint inn á vefverslunina.
4. Greiðslusíður eiga alltaf að vera dulkóðaðar
Slóðin á greiðslusíðum netverslana á að hefjast á stöfunum „https“, sem tryggir að öll gögn séu dulkóðuð. Stundum er þetta táknað með mynd af læstum lás við hlið slóðarinnar.
5. Ekki vista kortaupplýsingar á netinu
Algengt er að vefverslanir bjóði upp á að vista kortaupplýsingar og hið sama gera margir netvafrar. Við mælum ekki með þessu því alltaf er hætta á að þessar upplýsingar leki út. Því er öruggara að slá inn kortaupplýsingarnar hverju sinni í stað þess að vista þær í verslun eða vafra.
6. Vandaðu val á lykilorðum og ekki nota sama lykilorðið alls staðar
Það er alls ekki góð hugmynd að nota sama lykilorðið á mörgum stöðum. Innskráning með Facebook- eða Google-aðgangi getur þó verið ágæt og örugg leið til að skrá sig inn.
7. Fylgstu með færslum í netbankanum og appinu
Það borgar sig að fylgjast vel með bankareikningum og greiðslukortum, sérstaklega í fríum, í kringum stóra netverslunardaga og í aðdraganda jóla, þegar færslur eru óvenju margar. Í Landsbankaappinu er hægt að stilla kreditkort og fyrirframgreidd kort þannig að þú fáir skilaboð ef tekið er út af kortinu þínu án þess að kortið sjálft hafi verið afhent, t.d. þegar verslað er á netinu.
8. Kynntu þér við hvern þú ert að versla
Það er mikilvægt að þekkja seljandann og vöruna áður en þú gefur upp kortaupplýsingar, t.d. með því að leita að nafni verslunarinnar á netinu eða á samfélagsmiðlum eða spyrjast fyrir um reynslu annarra.
Þessar vefsíður safna upplýsingum um söluaðila:
Trustpilot Reviews: Experience the power of customer reviews
Google Safe Browsing – Google Transparency Report
9. Mundu að skrá þig alltaf út
Mundu að skrá þig alltaf út af netversluninni eftir að hafa verslað á netinu, sérstaklega ef þú samnýtir tölvur með öðrum.
Það er aldrei góð hugmynd að versla á opnu neti á kaffihúsum, flugvöllum eða álíka stöðum. Verslaðu helst á læstu neti heima hjá þér eða notaðu farsímagagnatenginguna í símanum þínum ef þú verslar utan heimilisins.
10. Notaðu vandaðar greiðsluleiðir
Þegar verslað er við vandaðar netverslanir er öruggt að nota greiðslukort. Til að takmarka frekar hættu á tjóni má nota t.d. Paypal, fyrirframgreidd kreditkort eða gjafakort. Ekki er mælt með millifærslum á reikning verslunar eða þjónustuveitanda.
11. Treystu á skynsemina og varastu tilboð sem eru of góð til að vera sönn
Ef tilboðið er óeðlilega gott eða eitthvað í tækniumhverfi eða útliti verslunarinnar er grunsamlegt skaltu einfaldlega hætta við kaupin eða að minnsta kosti kynna þér hlutina betur.
12. Veittu aðeins nauðsynlegar upplýsingar
Vefverslanir þurfa ýmsar upplýsingar eins og nafn, netfang og heimilisfang. En það er engin eðlileg ástæða til að biðja um mynd af skilríkjum, s.s. vegabréfi eða ökuskírteini, og ekki heldur upplýsingar um bankareikning, lykilorð, leyninúmer eða annað slíkt. Ef þú færð slíka beiðni skaltu hætta við viðskiptin.
13. Geymdu öll gögn
Geymdu kvittanir, pöntunarnúmer, vörulýsingar og auglýst verð á þeirri stundu sem kaupin fóru fram. Geymdu tölvupóstkvittanir og tilkynningar um viðskiptin.
14. Gættu þess að tölvan sé í lagi
Uppfærðu öryggisbúnað og hugbúnað reglulega og forðastu að nota tölvur sem þú veist að hafa ekki verið uppfærðar nýlega.
Pistillinn var síðast uppfærður í nóvember 2024.
