26. september 2022 - Greiningardeild
Vikan framundan
- Á miðvikudag birtir Hagstofan septembermælingu vísitölu neysluverðs. Við eigum von á að verðbólga dragist saman úr 9,6% í 9,4%. Sama dag birtir Seðlabankinn yfirlýsingu fjármálastöðugleikanefndar og fjármálastöðugleikaskýrslu.
- Á föstudag birtir Seðlabankinn ársfjórðungslega Hagvísa og Hagstofan birtir fjölda gistinótta í ágúst.
Mynd vikunnar
Íbúðum til sölu á höfuðborgarsvæðinu hefur fjölgað mjög frá því í vor, úr tæplega 500 í rúmlega 1.000. Fjölgunin skýrist frekar af því að fleiri eldri íbúðir hafa verið settar á sölu, heldur en að nýjum íbúðum fjölgi. Það bendir til að eftirspurn sé að dragast saman, frekar en að framboðið sé að aukast. Á sama tíma hefur kaupsamningum fækkað. Að íbúðum til sölu fjölgi á meðan kaupsamningum fækkar bendir einnig til þess að eftirspurn sé að dragast saman frekar en að framboð á markaðnum sé að aukast.
Helsta frá vikunni sem leið
- Vísitala íbúðaverðs á höfuðborgarsvæðinu lækkaði um 0,4% milli mánaða í ágúst. Þetta er í fyrsta sinn síðan í nóvember 2019 sem vísitalan lækkar milli mánaða. Þetta bendir til þess að aðgerðir Seðlabanka Íslands séu farnar að skila árangri. Þrátt fyrir það er verðbólga enn langt yfir verðbólgumarkmiði og því líklegt að Seðlabankinn haldi áfram að hækka stýrivexti til að draga úr eftirspurn, en tvær vaxtaákvarðanir eru eftir á þessu ári.
- Kaupmáttur ráðstöfunartekna á mann dróst saman um 0,5% milli ára á 2. ársfjórðungi. Ráðstöfunartekjur á mann jukust um 6,3% milli ára, en þar sem verð hækkaði meira en ráðstöfunartekjur dróst kaupmáttur saman. Þetta er í fyrsta sinn síðan á 4. ársfjórðungi 2020 sem kaupmáttur ráðstöfunartekna á mann dregst saman milli ára.
- Seðlabankar víða um heim hækkuðu stýrivexti í síðustu viku. Bandaríski seðlabankinn hækkaði vexti um 0,75 prósentustig, Englandsbanki um 0,5 prósentustig, svissneski seðlabankinn um 0,75 prósentustig, norski seðlabankinn um 0,5 prósentustig og sænski seðlabankinn um 1 prósentustig.
- Lánamál ríkisins luku útboði ríkisbréfa.
Hagtölur og markaðsupplýsingar
Þú gætir einnig haft áhuga á
27. mars 2025
Vísitala neysluverðs hækkaði um 0,37% á milli mánaða í mars, samkvæmt nýbirtum tölum Hagstofu Íslands. Ársverðbólga lækkar úr 4,2% í 3,8% og er komin undir efri vikmörk verðbólgumarkmiðs Seðlabanka Íslands, í fyrsta skipti frá því í lok árs 2020. Verðmælingin var nokkuð góð en við teljum að á næstunni hægi á hjöðnuninni.
24. mars 2025
Peningastefnunefnd lækkaði vexti um 0,25 prósentustig á miðvikudaginn í síðustu viku. Ákvörðunin var í takt við væntingar. Vísitala íbúðaverðs hélst nokkurn veginn óbreytt á milli mánaða í febrúar. Til samanburðar hækkaði verðið mun meira í febrúar í fyrra, um tæp 2%. Kortavelta landsmanna innanlands hélt áfram að aukast á milli ára í febrúar en jókst þó aðeins minna en undanfarna mánuði.
17. mars 2025
Við búumst við að peningastefnunefnd lækki vexti um 0,25 prósentustig á miðvikudaginn. Í síðustu viku fóru fram verðmælingar vegna marsmælingar vísitölu neysluverðs og við spáum því að verðbólga lækki úr 4,2% í 3,9%. Atvinnuleysi var 4,3% í febrúar og hækkaði um 0,4 prósentustig á milli ára. 147 þúsund erlendir ferðamenn fóru um Keflavíkurflugvöll í febrúar, 5,6% færri en í sama mánuði í fyrra.
13. mars 2025
Við spáum 0,25 prósentustiga vaxtalækkun í næstu viku. Verðbólga hjaðnaði um 0,4 prósentustig í febrúar en við teljum að hagvöxtur umfram væntingar og aukin neysla, lítil breyting á verðbólguvæntingum og ólga á vinnumarkaði haldi peningastefnunefnd á tánum.
13. mars 2025
Við spáum því að vísitala neysluverðs hækki um 0,54% á milli mánaða í mars og að verðbólga hjaðni úr 4,2% í 3,9%. Hjöðnun á milli mánaða skýrist ekki síst af töluvert minni hækkun á reiknaðri húsaleigu en fyrir ári síðan. Við gerum ekki ráð fyrir miklum breytingum á verðbólgu næstu mánuði og teljum að hún verði áfram rétt undir 4% í júní.
10. mars 2025
Verulegur halli mældist á viðskiptum við útlönd í fyrra og sömuleiðis á vöruviðskiptum í febrúar samkvæmt gögnum sem bárust í síðustu viku. Seðlabanki Evrópu lækkaði vexti í síðustu viku, eins og við var búist. Í vikunni fara fram verðmælingar fyrir marsmælingu vísitölu neysluverðs, Vinnumálastofnun birtir skráð atvinnuleysi og Ferðamálastofa birtir tölur um fjölda ferðamanna um Keflavíkurflugvöll.
7. mars 2025
Verulegur halli mældist á viðskiptum við útlönd í fyrra, en stór hluti hans var vegna færslna sem höfðu ekki í för með sér gjaldeyrisflæði og styrktist krónan því þrátt fyrir þetta og erlend staða þjóðarbúsins batnaði.
3. mars 2025
Mánaðarlegt fréttabréf frá Greiningardeild um nýjustu hagtölur og stöðu og horfur í efnahagsmálum.
3. mars 2025
Verðbólga lækkaði úr 4,6% í 4,2% í febrúar, en við teljum að heldur muni draga úr lækkunartakti verðbólgu næstu mánuði. Hagvöxtur mældist 2,3% á fjórða ársfjórðungi 2024 og 0,6% fyrir árið í heild. Umsvif í hagkerfinu voru umfram spár, en Hagstofan færði upp hagvöxt á fyrstu níu mánuðum ársins. Í vikunni fram undan eru nokkur uppgjör, Seðlabankinn birtir greiðslujöfnuð við útlönd og það er vaxtaákvörðun hjá Seðlabanka Evrópu.
28. feb. 2025
Hagvöxtur var 0,6% árið 2024. Krafturinn í hagkerfinu var lítillega umfram flestar spár sem gerðu heldur ráð fyrir lítils háttar samdrætti. Hagvöxturinn var ekki síst drifinn áfram af aukinni fjárfestingu, bæði í atvinnuvegum og íbúðauppbyggingu.