14. nóvember 2022
Vikan framundan
- Í dag birta Reitir árshlutauppgjör.
- Á þriðjudag birtir HMS vísitölu íbúðaverðs í október og Seðlabankinn tölur um greiðslumiðlun fyrir október.
- Á miðvikudag birtir Seðlabankinn niðurstöður úr könnun á væntingum markaðsaðila.
- Á fimmtudag birta Brim og Iceland Seafood árshlutauppgjör.
- Í vikunni fara síðan fram verðmælingar vegna nóvembermælingar vísitölu neysluverðs, en Hagstofan birtir hana þriðjudaginn 29. nóvember.
Mynd vikunnar
Vísitala heildarlauna hækkaði um 7,6% milli 2. ársfjórðungs 2021 og 2. ársfjórðungs í ár. Eins og oft vill verða var þróunin nokkuð ólík eftir því hvort um almenna eða opinbera markaðinn er að ræða og eins eftir atvinnugreinum. Þannig hækkuðu heildarlaun hjá opinberum starfsmönnum nokkuð meira en meðal starfsmanna á almennum vinnumarkaði. Ef við skoðum mismunandi atvinnugreinar sést að hækkunin var mest í greinum tengdum ferðaþjónustu, þ.e. í gististaða- og veitingarekstri og í leigustarfsemi og annarri sérhæfðri þjónustu, sem nær meðal annars til þjónustu ferðaskrifstofa og bílaleigubíla. Minnsta hækkun var í upplýsingum og fjarskiptum og í fasteignaviðskiptum.
Helsta frá vikunni sem leið
- Um 160 þúsund erlendir ferðamenn fóru frá landinu í októbermánuði sem er fjórði mesti fjöldi sem mælst hefur í októbermánuði. Svo virðist sem ferðaþjónustan sé orðin jafn umsvifamikil og áður en heimsfaraldurinn skall á, en október var fjórði mánuðurinn í röð sem það munaði innan við 5% á fjölda erlendra ferðamanna og í sama mánuði 2019. Nokkur breyting hefur orðið á samsetningunni frá því fyrir heimsfaraldurinn, en núna koma hlutfallslega fleiri ferðamenn frá Norður-Ameríku og Bretlandseyjum, en færri frá Austur-Evrópu, Asíu og Eyjaálfu. Brottfarir Íslendinga voru 72 þúsund og hafa aldrei mælst fleiri í októbermánuði. Icelandair og Play birtu síðan flutningstölur fyrir október í síðustu viku.
- Hagstofan birti bráðabirgðatölur um vöruviðskipti í október. Alls var hallinn á vöruviðskiptum við útlönd 53 milljarðar króna. Þetta er mesti halli sem mælst hefur í einum mánuði, en gögn Hagstofunnar ná aftur til ársins 2002. Uppsafnaður halli síðustu tólf mánaða er um 310 milljarðar króna. Það ber þó að hafa í huga að síðustu ár hefur verið halli af vöruviðskiptum og afgangur af þjónustujöfnuði þannig að þessar tölur þýða ekki endilega að það muni verða mikill halli á viðskiptum við útlönd í heild.
- Skráð atvinnuleysi mældist 2,8% í október og var óbreytt milli mánaða. Sem fyrr var atvinnuleysi hæst á Suðurnesjum (4,8%) og á höfuðborgarsvæðinu (3,0%) og lægst á Norðurlandi vestra (0,8%). Fyrir landið í heild var lítill munur á atvinnuleysi karla (2,7%) og kvenna (2,8%), en mesta atvinnuleysið mældist hjá konum á Suðurnesjum (5,6%).
- Hagstofan og Arion banki birtu hagspár í vikunni. Arion banki gerir ráð fyrir 6,0% hagvexti í ár og 1,6% á næsta ári, Hagstofan 6,2% í ár og 1,8% á næsta ári. Í nýjustu hagspá okkar spáðum við 6,5% hagvexti í ár og 2,1% á næsta ári.
- Seðlabankinn birti útreikning á raungengi í október og veltutölur af gjaldeyrismarkaði og krónumarkaði.
- Erlendis bar hæst verðbólgutölur í Bandaríkjunum, en verðbólga þar lækkaði úr 8,2% í 7,7% milli september og október og hefur ekki mælst lægri síðan í janúar. Mælingin var lægri en búist var við og hækkuðu markaðir vestanhafs mikið í kjölfarið.
- Sveitarfélagið Árborg og Reitir fasteignafélag héldu skuldabréfaútboð í síðustu viku. Lánamál ríkisins birtu Markaðsupplýsingar.
- Kvika banki birti árshlutauppgjör.
Hagtölur og markaðsupplýsingar
Þú gætir einnig haft áhuga á
10. mars 2025
Verulegur halli mældist á viðskiptum við útlönd í fyrra og sömuleiðis á vöruviðskiptum í febrúar samkvæmt gögnum sem bárust í síðustu viku. Seðlabanki Evrópu lækkaði vexti í síðustu viku, eins og við var búist. Í vikunni fara fram verðmælingar fyrir marsmælingu vísitölu neysluverðs, Vinnumálastofnun birtir skráð atvinnuleysi og Ferðamálastofa birtir tölur um fjölda ferðamanna um Keflavíkurflugvöll.
7. mars 2025
Verulegur halli mældist á viðskiptum við útlönd í fyrra, en stór hluti hans var vegna færslna sem höfðu ekki í för með sér gjaldeyrisflæði og styrktist krónan því þrátt fyrir þetta og erlend staða þjóðarbúsins batnaði.
3. mars 2025
Mánaðarlegt fréttabréf frá Greiningardeild um nýjustu hagtölur og stöðu og horfur í efnahagsmálum.
3. mars 2025
Verðbólga lækkaði úr 4,6% í 4,2% í febrúar, en við teljum að heldur muni draga úr lækkunartakti verðbólgu næstu mánuði. Hagvöxtur mældist 2,3% á fjórða ársfjórðungi 2024 og 0,6% fyrir árið í heild. Umsvif í hagkerfinu voru umfram spár, en Hagstofan færði upp hagvöxt á fyrstu níu mánuðum ársins. Í vikunni fram undan eru nokkur uppgjör, Seðlabankinn birtir greiðslujöfnuð við útlönd og það er vaxtaákvörðun hjá Seðlabanka Evrópu.
28. feb. 2025
Hagvöxtur var 0,6% árið 2024. Krafturinn í hagkerfinu var lítillega umfram flestar spár sem gerðu heldur ráð fyrir lítils háttar samdrætti. Hagvöxturinn var ekki síst drifinn áfram af aukinni fjárfestingu, bæði í atvinnuvegum og íbúðauppbyggingu.
27. feb. 2025
Vísitala neysluverðs hækkaði um 0,91% á milli mánaða í febrúar, samkvæmt nýbirtum tölum Hagstofu Íslands. Ársverðbólga lækkar því úr 4,6% í 4,2%. Við eigum enn von á að verðbólga hjaðni næstu mánuði, þó það hægi á lækkunartaktinum, og mælist 3,8% í maí.
24. feb. 2025
Í vikunni birtir Hagstofan febrúarmælingu vísitölu neysluverðs og þjóðhagsreikninga fyrir lokafjórðung síðasta árs. Í síðustu viku uppfærði Hafrannsóknarstofnun ráðleggingar um loðnuafla en samkvæmt því munu íslensk skip fá um 4,6 þúsund tonn. Í síðustu viku bárust einnig gögn um greiðslukortaveltu landsmanna í janúar sem var 6,5% meiri að raunvirði en árið áður. Vísitala íbúðaverðs hækkaði um 1,5% á milli mánaða í janúar, en svo mikið hefur hún ekki hækkað síðan í febrúar 2024.
21. feb. 2025
Íbúðaverð hækkaði mun meira í janúar en síðustu mánuði. Íbúðaverð hefur verið nokkuð sveiflukennt og óútreiknanlegt undanfarið en stökkið í janúar skýrist af verðhækkun á sérbýli. Íbúðum á sölu hefur fjölgað hratt síðustu mánuði og birgðatími lengst. Grindavíkuráhrifin hafa fjarað út að langmestu leyti og hækkanir á verðtryggðum vöxtum kældu markaðinn undir lok síðasta árs.
19. feb. 2025
Um 122 þúsund ferðamenn komu til landsins í janúar, samkvæmt talningu Ferðamálastofu. Ferðamenn voru 5,8% færri en á sama tíma í fyrra sem er á skjön við þróun síðustu mánaða, en allt frá því í júlí sl. hefur ferðamönnum fjölgað á milli ára. Þótt ferðamönnum hafi fækkað í janúar hélt kortavelta þeirra áfram að aukast.
18. feb. 2025
Enn eru merki um að landsmenn hafi svigrúm til neyslu þrátt fyrir langvarandi hávaxtastig. Kortavelta eykst með hverjum mánuðinum, utanlandsferðir í janúar hafa aldrei verið jafnmargar og í ár og samt virðast yfirdráttarlán ekki hafa færst í aukana. Á sama tíma hefur slaknað þó nokkuð á spennu á vinnumarkaði, eftirspurn eftir vinnuafli hefur dvínað og atvinnuleysi tók stökk í janúar þegar það fór yfir 4%.