Stefna okkar leggur áherslu á traust, mannleg og opin samskipti. Hún leggur einnig áherslu á að við séum til staðar fyrir viðskiptavini, störfum með þeirra hagsmuni að leiðarljósi og vinnum að því að  einfalda líf þeirra.

Þessi hugsun mótar allan okkar talsmáta. Við tölum við viðskiptavini okkar sem jafningja og sleppum öllum formlegheitum og orðlengingum eins og við mögulega getum. Við tölum sama mál og viðskiptavinurinn, byrjum á því sem skiptir máli og gerum okkar besta til að þýða tæknimál á mannamál.

Leiðartréð er opnað með því að smella á einn af aðalflokkunum í valmyndinni efst á vefnum. Þá opnast valmynd sem nær yfir allan skjáinn. Þar má grafa sig eftir leiðakerfinu til að finna þá síðu sem leitað er að.

Leitin á vefnum nýtir vefþjónustu frá Google til að finna það efni sem viðskiptavinurinn leitar að.

Við notumst við vefumsjónarkerfið Prismic sem er svokallað „headless CMS“. Slíkt kerfi aðgreinir efni vefsins – texta, myndir, myndbönd – frá framsetningarlaginu eða kóðanum. Þetta auðveldar okkur að birta sama efni með mismunandi hætti á ólíkum stöðum og tækjum og einfaldar breytingar og uppfærslu á útliti.

Efnið er svo birt með NextJS vefþjóni sem forsmíðað HTML (pre-built HTML) með stale-while-revalidate caching. Það er gert til að auka hraða við að hlaða inn síðum. Notast er við GraphQL bæði til að eiga samskipti við vefumsjónarkerfið og við vefþjónustur innan bankans.

Á vefnum og appinu geta fyrirtæki og einstaklingar komið í viðskipti við bankann. Það tekur aðeins örfáar mínútur að fá aðgang að netbanka og appi, stofna reikning og debetkort. Það eina sem þarf er rafræn skilríki.

Nokkrar háþróaðar reiknivélar er að finna á vefnum svo sem íbúðalánareiknivél, bílalánareiknivél, gjaldmiðlareiknivél, skuldabréfareiknivél og margt fleira. Hver þessara reiknivéla er unnin í náinni samvinnu við sérfræðinga á viðkomandi sviði og prófaðar með starfsfólki og viðskiptavinum á ólíkum stigum þróunarinnar. Fleiri reiknivélar eru í vinnslu.