Upplýsingar um bankaþjónustu við Grindvíkinga
Á meðan útibúið okkar í Grindavík er lokað, tökum við vel á móti Grindvíkingum í öðrum útibúum bankans. Það er einfalt að bóka tíma á vefnum og hægt er að velja á milli þess að fá símtal, fjarfund eða fund í því útibúi sem hentar. Landsbankinn er með útibú um allt land.
Atburðirnir gætu valdið því að margir einstaklingar verði fyrir tekjufalli og áhrifin eru sömuleiðis mikil á fyrirtæki í bæjarfélaginu. Við erum með ýmis úrræði í boði, bæði fyrir einstaklinga og fyrirtæki. Ef viðskiptavinir þurfa aðstoð eða vilja fara yfir fjármálin hvetjum við þá til að hafa samband við okkur.
Einfalt að fresta afborgunum (frysta)
Margir viðskiptavinir okkar í Grindavík eru með íbúðalán og þeir geta allir fengið að fresta afborgunum af lánunum. Hafðu samband við okkur ef þú vilt fresta afborgunum. Þú getur pantað tíma á landsbankinn.is eða sent okkur tölvupóst á landsbankinn@landsbankinn.is.
Hægt er að fresta afborgunum í allt að sex mánuði. Það er einfalt og fljótlegt og engin gjöld falla á viðskiptavini okkar í Grindavík vegna þess.
Margir viðskiptavinir eru með geymsluhólf í útibúinu. Geymsluhólf sem voru í útibúinu í Grindavík voru flutt í útibú Landsbankans í Mjódd miðvikudaginn 15. nóvember. Starfsfólk bankans í Grindavík hefur, eins og aðrir íbúar bæjarins, fengið húsaskjól í öðrum bæjarfélögum og þau munu öll halda áfram störfum fyrir bankann, ýmist í öðrum útibúum eða í fjarvinnu á meðan lokað er í Grindavík.
Starfsfólk bankans í Grindavík hefur, eins og aðrir íbúar bæjarins, fengið húsaskjól í öðrum bæjarfélögum og þau munu öll halda áfram störfum fyrir bankann, ýmist í öðrum útibúum eða í fjarvinnu á meðan lokað er í Grindavík.
Við fylgjumst vel með stöðunni og munum setja frekari upplýsingar hér á vefinn.
Fréttin var fyrst birt 13. nóvember 2023 og síðast uppfærð 16. nóvember 2023.
