Þú þarft að afbóka hótel og bílaleigubíla og geta sýnt fram á að þú hafir gert það eins fljótt og hægt er. Einnig þarftu að passa að það sé gert innan þess tímaramma sem gefinn er til afbókunar hjá söluaðila.

Ef endurgreiðsla berst ekki innan 15 daga frá því að þú sendir beiðni til söluaðila getur þú gert athugasemd við færsluna.

Ekki er hægt að gera endurkröfu vegna þjónustu ef skilmálar seljenda kveða á um að hún sé „óendurkræf“ (non-refundable).

Þó getur þú leitað réttar þíns hjá Verði ef ferðabann ríkir í landi þar sem skilmálar um bílaleigubíl eða hótelgistingu kveða á um að viðskiptin séu „óendurkræf“.

Hafðu samband við flugrekstraraðila, ferðaskrifstofur eða skipafélag vegna endurgreiðslna eða breytinga á ferðadagsetningum. Söluaðili þarf að bjóða endurgreiðslu, inneign, inneignarnótu, breytingu á dagsetningu eða annan sanngjarnan valkost sem samræmist kaupskilmálum í stað þeirrar þjónustu sem þú færð ekki. 

Þú átt endurkröfurétt ef söluaðilinn býður ekkert af þessu.

Flugfélög birta almennt greinagóðar upplýsingar um endurgreiðslu vegna flugs á heimasíðum sínum og oft er hægt að breyta flugdagsetningum í gegnum vefsíðu þeirra.

Endurkröfuréttur er ekki fyrir hendi ef sölu- eða þjónustuaðilinn er fær um að veita þjónustuna. 

Ef ferðabann kemur í veg fyrir ferð til ákveðinna landa, gætir þú átt kröfu undir forfallatryggingu tryggingafélaga. Það sama á við um hótel og bílaleigubíla. Áður en þú leggur inn kröfu hjá tryggingafélagi þarft þú að skoða vel hvort þjónustan eigi að vera veitt á þeim degi sem bannið er í gildi og hvort þú getir fengið endurgreiðslu frá söluaðilanum.  

Nánari upplýsingar veitir Vörður. 

Hafðu samband við söluaðilann og reyndu að leysa málið á sem farsælastan hátt. Þú þarft að afpanta miða ef það er mögulegt án endurgjalds, breyta dagsetningu eða fá endurgreitt frá söluaðila ef hægt er. 

Ef söluaðili verður að aflýsa viðburði að kröfu yfirvalda og söluaðili býður þér endurgreiðslu, inneign, inneignarnótu, breytingu á dagsetningu eða annan sanngjarnan valkost sem samræmist kaupskilmálum í stað þeirrar þjónustu sem þú færð ekki, en þú ákveður að þú viljir ekki þiggja boð söluaðila um annan valkost (t.d. ef söluaðili ákveður að færa viðburðinn á aðra dagsetningu og bjóða þér á þann viðburð, en þú kemst ekki) átt þú ekki endurkröfurétt. 

Ef aðgerðir yfirvalda koma í veg fyrir að söluaðili geti veitt þjónustuna ættir þú að reyna að leysa málið með söluaðilanum. Hér getur verið um að ræða aðgangskort í líkamsræktarstöðvar, sundlaugar, árskort að söfnum, leikhús, bíó, tónleika, skemmtigarða o.s.frv. Ef bókunarskilmálar söluaðila kveða á um að varan eða þjónustan sé óendurkræf (non-refundable) verður þú að reyna að leysa málið með söluaðila fyrst. Söluaðila ber að bjóða endurgreiðslu, inneign, inneignarnótu, breytingu á dagsetningu eða gildistíma eða annan sanngjarnan valkost sem samræmist kaupskilmálum í stað þeirrar þjónustu sem þú færð ekki. Geri söluaðili það ekki áttu endurkröfurétt, að því gefnu að skilyrði kortasamtakanna séu uppfyllt. 

Ef endurgreiðsla berst ekki 15 dögum eftir að þú sendir beiðni til söluaðila getur þú gert athugasemd við færslu, svo framarlega sem bókunarskilmálar kveða á um rétt til afbókunar og endurgreiðslu. 

Kortatryggingar bæta yfirleitt ekki atburði, leikhús, tónleika eða skipulagðar ferðir.